Dhjetëra protestues dolën në rrugët e disa qyteteve të Ukrainës të enjten, pas vendimit të papritur të presidentit Volodymyr Zelensky për të shkarkuar ministrin e Mbrojtjes, Mykhailo Fedorov. Në Kiev, shumica e protestuesve ishin të rinj, të cilët mbanin pankarta me mesazhe si “Larg duart nga Fedorov” dhe “Ndalo sabotimin e fitores”, ndërsa brohorisnin “Turp!”.
Vendimi ka shkaktuar reagime të forta në radhët e ushtrisë, analistëve dhe një pjese të shoqërisë civile, ndërsa vetë Fedorov dhe Zelensky konfirmuan se në prapaskenë kishte pasur mosmarrëveshje të thella mes ministrit tashmë të shkarkuar dhe komandantit të përgjithshëm të forcave të armatosura, Oleksandr Syrskyi.
Në një konferencë për mediat, Fedorov bëri të ditur se i kishte propozuar presidentit zëvendësimin e Syrskyit dhe shefit të Shtabit të Përgjithshëm, Andrii Hnatov. Nga ana tjetër, Zelensky, gjatë një konference të përbashkët me kryeministrin britanik Keir Starmer, pranoi se konflikti mes Shtabit të Përgjithshëm dhe Ministrisë së Mbrojtjes kishte qenë “sistematik” dhe se bashkëpunimi mes Syrskyit dhe Fedorovit ishte bërë i mundur vetëm me ndërmjetësimin e tij.
“Kur presidenti më tha se nuk kishte ndërmend të zëvendësonte Syrskyin, pranova të mësoja të punoja me të. Por të gjitha iniciativat tona u bllokuan,” deklaroi Fedorov, duke akuzuar komandantin e përgjithshëm se në vend që të gjente mënyra të reja për të mposhtur Rusinë, kishte përçarë vendin.
Nga ana e tij, Syrskyi reagoi shkurt në Telegram, duke thënë se ishte krenar për mbrojtjen e Kievit në vitin 2022 dhe se do të vazhdonte të përqendrohej në luftë dhe strategjinë ushtarake, ndërsa i uroi Fedorovit suksese.
Mykhailo Fedorov, 35 vjeç, ishte emëruar ministër i Mbrojtjes vetëm në janar, por fitoi shpejt mbështetje për përpjekjet në luftën kundër korrupsionit, modernizimin e ministrisë dhe përdorimin e teknologjisë për të përmirësuar efektivitetin e ushtrisë në vijën e frontit.
Ai kishte udhëhequr më parë Ministrinë e Transformimit Digjital, ku krijoi “IT Army of Ukraine”, një rrjet vullnetarësh për sulme kibernetike kundër Rusisë, si edhe projektin “Army of Drones”, që promovoi përdorimin e dronëve dhe teknologjisë në fushën e betejës. Ministria e tij luajti gjithashtu rol të rëndësishëm në sulmet e fundit ukrainase ndaj Krimesë së pushtuar nga Rusia.
Pas shkarkimit, Fedorov njoftoi se presidenti i kishte ofruar një post si këshilltar, por ai e kishte refuzuar. Megjithatë, ai theksoi se nuk synon të përballet me Zelenskyn dhe se beson se presidenti “e dëgjon popullin ukrainas” dhe do ta zgjidhë situatën.
Ndërkohë, parlamenti ukrainas pritet të votojë për ministrin e ri të Mbrojtjes. Emri më i përfolur është ai i ministrit të Brendshëm, Ihor Klymenko, megjithëse Zelensky deklaroi se ende nuk është paraqitur një kandidaturë zyrtare dhe se po shqyrtohen disa alternativa.
