Prokuroria e Krimeve të Rënda po e konsideron të pavlerë vendimin e mazhorancës parlamentare për të lejuar vetëm kontrollin e banesës së ish -ministrit të Brendshëm, Saimir Tahiri dhe për të ushtruar kontroll personal ndaj tij.
“Pas kaq kohe është e pakuptimtë të ushtrosh kontroll banese”, tha për Lapsi.al një burim nga prokuroria.
Prokurorët nuk do të shkojnë as në Gjykatë për të marrë mandat për të kontrolluar apartamentin e deputetit Tahiri.
“Kjo nuk do të thotë se hetimet nuk do të vazhdojnë”, sqaroi i njëjti burim.
Krimet e Rënda e kërkuan kontrollin e banesës, pasi synonin të gjenin aty sendet e çmuara që grupi i Habilajve thoshte në bisedat e përgjuara, se i kishte bërë dhuratë Tahirit për nënën dhe bashkëshorten.
“Ka kaluar 1 javë. Kontrolli duhet të kishte qenë i menjëhershëm”, vijon burimi nga Prokuroria.
Pyetja që lind në këtë rast, është përse Prokuroria nuk shkoi në gjykatë që në fillim, dhe do të mund të kishte marrë lejen për të kontrolluar shtëpinë e Tahirit.
Madje mund të kishte kërkuar edhe arrestimin e tij në gjykatë.
Por, kërkoi lejen e parlamentit për ta politizuar këtë çështje dhe tani që “provave të forta” iu doli boja, Prokuroria nuk guxon të shkojë as në gjykatë, për të kërkuar sërish jo vetëm kontrollin e shtëpisë së Tahirit, por edhe arrestimin e tij.
Prokuroria nuk e ndërmerr këtë hap, pasi e di se me këto prova që ka, edhe gjykata do ta rrëzojë prokurorinë e saj.
Pas zhurmës së madhe dhe “hetimit” të bujshëm, Prokuroria tashmë duket se ka ngecur në vend, pasi as nga dosja italiane, nuk ka mundur dot të sigurojë ndonjë provë kundër Tahirit!
