Prokurori i Vlorës Maksim Sota nuk do të jetë më pjesë e sistemit të drejtësisë. Sota ka paraqitur dorëheqjen nga funksioni i prokurorit pranë Këshillit të Lartë të Prokurorisë, kërkesë e cila është pranuar në 14 janar 2022. Në këto rrethana, Komisioni i Vetingut, në 17 shkurt 2022, ka vendosur të ndërpresë procesin e Vetingut për prokurorin Sota, duke e përjashtuar për 15 vitet e ardhshme nga e drejta për t’u bërë pjesë e drejtësisë. Procesi i verifikimit për prokurorin e Vlorës kishte nisur që në mars të vitit 2019.
Maksim Sota u arrestua nga SPAK në 2 korrik të vitit 2021, gjatë operacionit të koduar “Shpirti”, së bashku me 28 të tjerë, të dyshuar si pjesë e një organizatë të mirëfilltë kriminale që merrej me kultivimin dhe trafikimin e lëndëve narkotike. Arrestimet janë shtrirë në Shqipëri, Itali, Mali i Zi dhe Spanjë. Pas arrestimit, për prokurorin Sota u vendos masa e sigurisë ‘arrest shtëpie’. Në 5 korrik 2021, Këshilli i Lartë i Prokurorisë vendosi të pezullonte nga detyra prokurorin Sota për shkak të procedimit penal të nisur ndaj tij.
Sota akuzohet për shpërdorim detyre. Sipas dosjes, roli i supozuar i prokurorit Maksim Sota rezulton nga deklarimet e bashkëpunëtorëve të drejtësisë Donial Droli dhe Maringlen Shusha, sipas të cilëve drejtuesi i grupit kriminal shqiptar Ilirjan Duçellari (Zaimi), arrestuar në Shqipëri në korrik 2020, kishte lidhje me prokurorin, madje i kishte siguruar një shtëpi me qira, të cilën e paguante trafikanti. Në këtë banesë Sota jetonte bashkë me Maringlen Shushaj. Prokurori i mohoi akuzat.
Gjithsesi, mbi bazën e këtyre dëshmive, u krijua dyshimi për “infiltrimin e grupit kriminal në radhët e përfaqësuesve që ushtrojnë ndjekjen penale në emër të shtetit me pasojë të drejtpërdrejtë vështirësi dhe pengesa shtesë në drejtim të parandalimit dhe luftimit të këtyre veprimtarive kriminale”. Në dhjetor të vitit 2021, SPAK përfundoi hetimet dhe dërgoi për gjykim në Gjykatën e Posaçme dosjen e operacionit “Shpirti”, me 31 të pandehur që akuzohen për trafikim narkotikësh dhe grup të strukturuar kriminal. Mes tyre është edhe prokurori Sota.
