Prokurorët e Krimeve të Rënda, Besim Hajdarmataj dhe Vladimir Mara morën në pyetje këtë të enjte, 14 anëtarët e grupit të Habilajve, mes tyre edhe Moisi Habilaj, Nazer Seiti dhe Meridian Sulaj. Seanca me prokurorët shqiptarë u zhvillua paraditen e sotme (30 Maj) dhe zgjati rreth 3 orë. Megjithatë nuk bëhet ende e ditur se për çfarë janë pyetur anëtarët e bandës.
14 anëtarët e bandës pritet të dalin të premten përpara gjykatësit.
Prokurorët shqiptarë udhëtuan drejt Katanias pak ditë më parë për të hedhur dritë mbi lidhjet e mundshme mes grupit të Habilajve dhe ish-ministrit të Brendshëm Saimir Tahiri.
Përmes këtij udhëtimi synohet marrja e informacioneve të vlefshme për hetimet që kryen në Shqipëri. Prova kryesore që do të marrin hetuesit shqiptarë janë dëshmitë e Nazer Seitit, Meridian Sulajt dhe Moisi Habilajt. Këta dy të fundit ndodhen në një burg në Katania, ndërsa Seiti për arsye të cilat nuk shpjegohen mbahet në një burg në Romë. Dëshmia e ketyre personave do të merret para datës 31 maj, ditë kur dosja italiane ndaj grupit të “Habilajve” do të shkojë në gjykatë. Seanca e parë do të jetë paraprake, pasi të pandehurit do të njihen me akuzat dhe ata do të mbajnë një qëndrim për to. Ndërsa gjyqi në themel pritet të nisë disa muaj më vonë.
Saimir Tahiri u vu nën hetim nga Prokuroria shqiptare, pasi MeridioNews publikoi disa përgjime të vëllezërit Moisi dhe Florian Habilaj, ku përfshihej edhe emri Saimir.
Dyshime mbi përfshirjen e ish-ministrit në trafikun e tyre të drogës lindin edhe nga automjeti tip Audi të cilin ish-ministri tha se ua kishte shitur Habilajve. Rezulton se ata e kanë përdorur automjetin në disa udhëtime, me qëllim që të mos binin në gjurmët e policisë.
Të hënën Saimir Tahiri u lirua nga arresti i shtëpisë për tu gjykuar në gjendje të lirë. Vendimi u mor nga po e njëjta trupë e Apelit të Krimeve të Rënda që i zhbllokoi pasaportën Dhjetorin e vitit të kaluar.
