Ura e gurtë e Çinës në Delvinë, monument kulture i kategorisë I, do t’i nënshtrohet restaurimit.
Instituti i Monumenteve të Kulturës bën të ditur se për restaurimin e urës, e cila është lehtësisht e vizitueshme, do të kujdeset Drejtoria Rajonale e Trashëgimisë Kombëtare Vlorë.
Sipas IMK-së, kujdesi, mirëmbajtja dhe promovimi i trashëgimisë sonë kulturore është një mision i përbashkët, për t’i përçuar këto pasuri në mënyrën e duhur tek brezat e ardhshëm.
Pasuritë kulturore në të gjithë Shqipërinë vëzhgohen dhe mirëmbahen në mënyrë sistematike nga specialistët e Drejtorive Rajonale të Trashëgimisë Kulture.
Ura e Çinës, ndodhet në rrugën mesjetare Delvinë – Bregdet, kalldrëmi i së cilës ruhet akoma mirë, kalon rrëzë vargmalit dhe është ndërtuar me gurë të mëdhenj, të vendosur pa rregull e të plotësuar me gurë të vegjël.
Sipas gojëdhënës, ura është ndërtuar për nder të një gruaje. Ka vetëm një hark në formë segmenti rrethor me mbështetje të pjerrëta, duke pasur 2.5 m lartësi mbi nivelin e ujit.
Gjerësia e urës është 2 m dhe kalldrëmi i saj ka pasur nga të dyja anët një parapet guri me 0.40 m lartësi të realizuar me kolona guri.