Ndërsa Komisioni i Rithemelimi po zhvillon zgjedhjet për kryetarin e PD, në Kukës është tërhequr nga gara kandidati për kryetar të degës, Irel Elezi. Sipas Elezit janë vendosur 200 emra të rinj në listën e zgjedhësve gjatë ditës së djeshme dhe nuk janë demokratët me kontribut 30 vjeçar në PD.
Ai e cilëson procesin të manipuluar dhe u bën thirrje demokratëve të mos votojnë aty ku vërejnë paligjshmëri dhe shkelje.
“Pas verifikimit që i kam bërë listës kam parë që në listën e zgjedhësve janë mbi 200 emra të rinj dhe shumë demokratë që kanë kontribut 30 vjeçare ne PD nuk janë në listën e sjellur nga Tirana. Kam kërkuar sipas normave dhe statutit të partisë regjistrin e anëtarësimit të këtyre emrave të rinj. E kam kërkuar në fillim të procesit për të parë nëse eështë gjithçka konform statutit. Nuk më kanë vënë në dispozicion listën dhe kanë refuzuar sqarimet. Kërkesa ime është marrë parasysh vetëm pasi jam tërhequr nga gara. Emri im nuk duhet të figurojë më në listë.
E konsideroj procesin të manipuluar dhe ju bëj thirrje të gjithë demokrateve se aty ku vëreni shkelje e paligjshmëri reagoni dhe mos pranoni të votoni”.
Ndërkohë procesi ka nisur në orën 8-00 të mëngjesit dhe deri tani po vijon normalisht dhe me një pjesëmarrje të gjerë. Pas tërheqjes së Irel Elezit në garë është vetëm Admir Sinamati.
Halit Muçmata nga Komisioni i Rithemelimit për procesin e votimit konfirmon zyrtarisht se Irel Elezi është tërhequr nga gara dhe sipas tij procesi po vijon pa probleme. Për zgjedhjen e Kryetarit të ri janë ftuar mbi 2 mije anëtarë të PD Kukës.
