Ministrja e Shëndetësisë, Ogerta Manastirliu, ishe sot në qendrën shëndetësore Porto Romano në periferi të Durrësit, ku u shpreh se duhet forcë dhe durim për t’ia dalë këto muaj të dimrit me pandeminë.
Gjatë kësaj vizite, Manastirliu theksoi se “presim që vaksina të vijë në një kohë të shpejtë të jetë e aksesueshme duke nisur me personelin shëndetësor, grupet e rriskut e më pas në gjithë popullatën”.
Ndërkohë kjo qendër shëndetësore është e rehabilituar, pjesë e programit kombëtar të 300 qendrave shëndetësore.
Sipas ministres, me buxhetin e vitit 2021, “me rritjen historike për sektorin e shëndetësisë, do të vijojmë përmirësimin e infrastrukturës shëndetësore dhe shërbimeve për qytetarët, për më shumë akses dhe cilësi në shërbimet shëndetësore falas, afër vendbanimit”.
“Paketa më e fundit e miratuar nga qeveria e barnave të rimbursuara falas për trajtimin e simptomave covid, tjetër paketë e shtuar e do vijojë për 2021 me fondet e dedikuara të buxhetit të shtetit. Sistemi do vijojë të fuqizohet”, tha Manastirliu.
