Presidenti i shkarkuar katalanas, Carles Puigdemont, i cili është në kërkim nga autoritetet spanjolle ka pranuar që të dialogoj. Ai është shprehur se është i gatshëm që të krijoj një marrëdhënie të re me Spanjën. Në një intervistë për shtypin belg, ish lideri deklaroi se pavarësia e Katalonjës dhe shkëputja e saj nga Spanja nuk është e vetmja zgjidhje për të shuar konfliktin. Me tone të zbutura, Puigdemont tha se mund të nevojiten bisedime të mëtejshme dhe një marrëveshje e re me qeverinë spanolle, shkruan Reuters.
Ai tha se është i gatshëm të pranojë realitetin e një marrëdhënieje të re edhe pse ka vite që punon fort për pavarësinë e Katalonjës. Puigdemont aktualisht ndodhet në Bruksel dhe i është lëshuar një urdhër-arresti ndërkombëtar, mbi të cilin rëndojnë akuzat për rebelim dhe përçarje.
Ndërkohë që Puigdemont ka zbutur qëndrimin e tij, kryeministri spanjoll Mariano Rajoy i bëri thirrje katalanasve në ditë më parë, që të votojnë në zgjedhjet rajonale të 21 dhjetorit për të normalizuar situatën.
Në vizitën e tij të parë në Barcelonë, që kur parlamenti spanjoll vendosi sundimin direkt në Katalonjë dhe shkarkimin e zyrtarëve rajonalë, Rajoy propagandoi për partinë e tij dhe kandidatin Xavier Garcia Albiol duke i bërë thirrje popullit rajonal katalanas të votojnë kundër përçarjes dhe ideve separatiste.