Ditën e sotme në emisionin “Shqipëria Live” ishte e ftuar 12-vjeçarja, Ersi, e cila javën e kaluar përloti të gjithë me dëshirën e saj në programin “Më thuaj një dëshirë”.
Mamaja e saj, Ilda dy vite më parë ishte diagnostikuar me kancer dhe pas shumë seancave të kimioterapisë, i kanë rënë flokët. Ajo kishte siklet të dilte me flokë të shkurtra, e si pasojë mbante gjithmonë paruke, të cilat herë pas here e bezdisnin.
Si pasojë, Ersi shprehu dëshirën që nëna e saj të kishte ectensions dhe “Më thuaj një dëshirë”, arriti që të bënte të lumtur atë dhe Ildën.
Në studion e “Shqipëria Live”, Ersi u shpreh se ajo ishte dëshira e saj e vetme, pasi donte që koka e mamasë së saj të merrte ajër nga parukja.
“E kuptoja edhe vetë që parukja e bezdiste, se mami nuk ishte ashtu siç kishte flokët e veta. Doja që ti bëja mamit flokët, e mendoja se edhe fëmijët e tjerë do të kenë ndonjë dëshirë më të madhe se unë. A do më realizohet dëshira. Ishte edhe një vajzë tjetër që donte diçka për babanë e saj, që kishte një problem”, tha ajo.
Dhe u lumturua shumë kur mori telefonatën nga moderatorja e emisionit, Fjoralba Ponari. “Isha në shtëpi, po bëhesha gati që të ikja në shkollë. Nëna e gjyshi e dinin, por nuk i kemi treguar mamit. Nuk e di as vetë se si nuk ja kam treguar mamit dëshirën, por thashë ta mbaj sekret që edhe të realizohet”, tha 12-vjeçarja e cila tregoi se ka shumë dëshirë që të bëhet mjeke.
Ersi gjithashtu dha edhe një mesazh për të gjithë fëmijët që janë në një situatë si ajo, që të mos shqetësojnë prindërit dhe t’u rrinë pranë atyre.
