Mjafton të shikoni sesi po përpëlitet përballë drejtësisë së re, flamurmbajtësi i sistemit të vjetër Adriatik Llalla, për të kuptuar se institucionet e reja kanë nisur të flasin përmes ligjit dhe jo “Maliqit”.
Ish Prokurori i Përgjithshëm, ka munguar në seancën e radhës, të caktuar për të nga Gjykata e Posaçme e Apelit për Korrupsion dhe Krimin e Organizuar. Veç tij, ka munguar si rëndom në seancat e fundit, edhe avokati. Duke e bërë në këtë mënyrë, të plotë skemën banale të ikjes nga përballja me të vërtetën, përmes vonesave proceduriale.
Seanca e radhës ironikisht është caktuar më 9 shtator, ditën që do të nisë sezoni i ri politik dhe mblidhet Parlamenti i dalë nga zgjedhjet e 25 prillit, ku pas 2 vjetësh e gjysëm lufte në rrugë dhe bojkotit të zgjedhjeve locale 2019 në mbrojtje të drejtësisë së vjetër dhe Adriatik Llallës, PD dhe LSI do të rikthehen për herë të parë në sallë.
Ish Kryeprokurori është dënuar me 2 vjet burg për mosdeklarim dhe fshehje të pasurisë, i janë sekuestruar disa parcela me mbi 22 mijë metra katrorë tokë në periferi të Tiranës dhe 1 apartament në Durrës.
Mungesat e Llallës dhe avokatit të tij në seancat e fundit, sipas juristëve, janë thjeshtë një manovër për ta zvarritur sa më shumë procesin. Me sa duket duke u gjendur përpara fakteve të pakundërshtueshme të ofruara nga SPAK dhe Gjykata, ata janë të bindur në fajësinë dhe konfirmimin e pashmangshëm të dënimit, edhe nga gjykata e shkallës së dytë.
Për të shmangur vuajtjen e dënimit në qeli, po kërkohet që ky vendim të shtyhet përtej limiteve, në mënyrë që koha e burgosjes të jetë konsumuar deri në deklarimin e trupit gjykues të shkallës së dytë, kur vendimi të mari formë të prerë. Kjo është seanca e 3 apo e 4 që shtyhet përmes manovrave të tilla proceduriale. Radhën e kaluar Llalla vetë u paraqit fizikisht në seancë, por mungoi avokati i tij, të cilin gjykata u detyrua për shkak të përsëritjes që ta dënojë edhe me gjobë.
Pavarësisht këtyre akrobacive juridike, dënimi i Adriatik Llallës nga drejtësia e re, herët ose vonë duket e pashmangshme. Ai dhe familja e tij është shpallur “non grata” në shkurt te 2018, nga Sekretari Amerikan i Shtetit z. Rex Tillerson, për shkak të përfshirjes në mënyrë “domethënëse” në korrupsion ose shkelje të mëdha të të drejtave të njeriut.
Ish Prokurori i Përgjithshëm është konsideruar gjerësisht brenda sistemit të vjetër, si pengesa më e madhe sëbashku me lidershipin politik të opozitës, për zbatimin e Reformë së re në Drejtësi.
Alpenews.al
