Tre persona janë vënë në pranga nga policia e Kavajës pasi janë kapur me 11,7 kg kanabis. Tre të arrestuarit janë M. K., 23 vjeç, lindur dhe banues në Kavajë, O. L. 25 vjeç, lindur dhe banues në Divjakë si dhe E. M. 40 vjeç, lindur dhe banues në Divjakë.
Personat në fjalë janë arrestuar në kuadër të operacionit ‘Porosia e Fundit’ ku si fillim u kap në flagrancë M. K., 23 vjeç, ku gjatë kontrollit të ushtruar në mjetin e tij, iu gjet një sasi prej rreth 1 kg lëndë narkotike kanabis, si dhe një sasi lekësh që dyshohet se janë përfituar nga shitja e lëndës narkotike, dy aparate celulare që përdoreshin për të siguruar klientelë, si dhe një automjet që mundësonte shpërndarjen e lëndës narkotike.
Operacioni më tej ka vijuar në bashkëpunim me Komisariatin e Policisë Divjakë, në fshatin Çermë, ku u bë arrestimi i O. L., 25 vjeç, pasi gjatë kontrollit në magazinën e tij afër vendit ku banonte, iu gjet dhe iu sekuestrua një sasi prej rreth 10,7 kg lëndë narkotike kanabis. Po në kuadër të operacionit, u bë dhe kapja e E. M., 40 vjeç banues në Zharnec-Divjakë.
Të arrestuarit do të përballen me akuzën e “Prodhimi dhe shitja e lëndëve narkotike” kryer në bashkëpunim.
