Prag ditëlindjes së 82-të të Kadaresë, Onufri solli pranë lexuesit një vëllim të plotë poetik që përmban punën e 50 viteve. Quhet “Vepra poetike në një vëllim”, poezitë u zgjodhën nga vetë shkrimtari dhe janë libri i kësaj jave.
Kadare është tashmë një shkrimtar i pjekur, ia njohim veprat, stilin dhe trashëgiminë. Prej këtij familjariteti me figurën e tanishme të shkrimtarit, bëhemi kuriozë për fillimet e tij, kur poezitë ishin ende të çiltra. Pikërisht këtë përcjell ky vëllim. Studiuesi Sadik Bejko e tha më mirë:
“Kjo përmbledhje e plotë e poezive dhe poemave të Kadaresë, duke ndjekur rendin kronologjik të kohës së krijimeve, jep mundësi për të vërejtur evoluimin në artin, në stilin e autorit; poezitë regjistrojnë çaste të gjalla nga jeta e autorit, sjellin atmosferën e kohës, elemente intimë të biografisë, çaste kohore të së përditshmes, që, duke u shndërruar në poezi, bëhen lëndë e përjetshme.”
Përshtypjet e tij të plota mund t’i lexoni këtu.
Kadareja hoqi dorë nga poezia në 2005-n, kur publikoi “Tirana në dimër” dhe ky arkiv i thesareve të vjetra merr rrjedhimisht më shumë vlerë.
Vëllimin poetik mund ta gjeni në çdo librari, ose në Bukinist.al. Ndërsa këtu mund të lexoni për librin e javës së kaluar.
/anabel
