Një prokurore shqiptare në Shtetet e Bashkuara të Amerikës ka kërkuar ndihmë për sigurinë e saj, pasi thotë se ka marrë me dhjetëra telefonata që e kërcënojnë me vdekje. Bëhet fjalë për prokuroren e Loudoun-it, Buta Biberaj. Mediat amerikane shkruajnë se Biberaj është një emigrante myslimane e gjeneratës së parë. Ajo është portretizuar nga faqet e internetit që i përkasin krahut të djathtë si prokurore emigrante e cila ka shënjestruar babain e një viktime përdhunimi në shkollë.
Ajo është kritikuar edhe nga kandidati republikan për guvernator në Virxhinia, Glenn Youngkin, i cili tha në një fjalim të martën se Prokuroria e Loudoun-it shënjestroi familjarët e viktimës.
“Kam marrë me dhjetëra kërcënime me vdekje të specifikuara drejt meje. Më së shumti janë kryer nëpërmjet telefonit. Kam marrë një telefonatë në numrin personal ku thuhej fraza “Po vijmë k**vë”. Kam marrë edhe një kërcënim në numrin e zyrës dhe flitej që do të më vrisnin”, tha ajo.
Biberaj pretendon se kërcënimet me vdekje janë shtuar shumë gjatë tre javëve të fundit.
“Kanë bërë deklarata të tilla që të mos shqetësohem për të parë nga mbrapa pasi do të vijnë nga para”, ka thënë ajo.
Prokurorja me origjinë shqiptare beson se telefonuesit kanë qëllim ta vrasin atë. Autoritetet po hetojnë rastin nuk japin të dhëna nëse deri më tani është arrestuar ndonjë person.
Por cila është ngjarja për të cilën është kryqëzuar prokurorja shqiptare?
Bëhet fjalë për arrestimin e babait të një viktime përdhunimi në një shkollë, i cili u vu në pranga gjatë takimit të bordit të institucionit. Por pas një përleshje zyra e sherifit e arrestoi dhe jo prokuroria.
Prokurorja shqiptare ka thënë se policët nuk ishin në dijeni që i arrestuari ishte babai i një viktime përdhunimi kur e arrestuan. Biberaj ka shtuar se zyra e saj nuk kishte për qëllim që të shënjestronte babain, por ka hapur procedimin penal pas referimeve të bëra nga Sherifi. Ajo ka shtuar se çështja e tij është në apel, ndërsa babai ka thënë se do të padisë Qarkun Loudoun.
Biberaj tashmë është e frikësuar për jetën e vet dhe thuhet se po mendon që të punësojë roje privatë. Ajo është goditur shumë nga grupet e djathta. Mediat shkruajnë se Biberaj ka lindur në Malin e Zi. Sipas tyre, ajo është zgjedhur në detyrë pasi George Soros e ka mbështetur atë. Biberaj ka pranuar se gjatë fushatës ka marrë para nga Soros, por ky i fundit “nuk i ka kërkuar asgjë mbrapsht”.
Biberaj ka reaguar ashpër edhe ndaj kandidatit republikan për guvernator.
“Kjo më shqetëson mua, dikush që kandidon për guvernator dhe nuk është i interesuar për sigurinë e komunitetit, por e ndez atë. Kjo duhet ta bëjë atë të papërshtatshëm për të qenë guvernator”, tha ajo.
