Vijon në Gjykatën e Posaçme kundër Korrupsionit dhe Krimit të Organizuar (GJKKO) dëshmia e bashkëpunëtorit të drejtësisë, Erion Alibej, në kuadër të dosjes së njohur si “Plumbi i Artë”. Në një deklarim të gjatë dhe të tensionuar para trupës gjykuese, Alibej theksoi se vetëm një pjesë e të pandehurve aktualë janë realisht të përfshirë në akuzat e ngritura.
Alibej kërkoi nga gjykata që deklarimet e tij të mëparshme të mos i vihen në dispozicion avokatëve mbrojtës, duke lënë të kuptohet se ato mund të përdoren për qëllime të tjera.
“Unë kam bërë një deklarim shumë të gjerë dhe në gjykimin tim i takon vetem 25% të këtyre të akuzarve këtu. Kush e mbron Plarent Dervishajn nga ju? Suel Çelën? Apo njerez të trafikut të drogës? Për persona që nuk janë pjesë e këtij procesi, unë do isha i pari që do i kerkoja gjykatës të viheshin fashikujt në dispozicion. Kam dhënë një deklarim shumë të madh, kam përmend shumë njerëz.
Sa herë që do kërkohet nga çdo kush, unë mezi pres të ballafaqohem me këdo. Do ju lutesha që deklarimet e mia të meparshme të mos i viheshin ne dispozicion avokatëve. Unë i di shumë mirë lojërat e këtyre. Avokatëve nuk u intereson çfarë kam thënë unë, por kanë interes për kundërshtarët tonë që janë jashtë”.
