Seanca plenare e Kuvendit ka shpërthyer në një përplasje të ashpër mes deputetit të PS, Erion Braçe, dhe deputetes demokrate Ina Zhupa. Shkak për këtë konfrontim u bë një deklaratë e Zhupës për mediat, ku ajo akuzoi qeverinë për përpjekje për të persekutuar median që nuk mbështet politikën e saj.
Zhupa kërkoi mbylljen e komisionit të dezinformimit, duke theksuar se qeveria po tenton të shtypë median që nuk e mbështet. Braçe reagoi me tone të ashpra, duke i thënë Zhupës se “duhet të hetohet për dizinformim”, dhe se ajo “nuk di të lexojë” dhe “nuk dëgjon”. Ai e përshkroi më tej Zhupën me kritika personale, duke i thënë “Mos u lyej me parfum, por pri thonjtë.”
Braçe u shpreh se gjatë mbledhjes së djeshme, ai nuk ka kërkuar që të hetohen gazetarët, por vetëm autorët e dezinformimit, dhe kërkoi që të hetohen personat që qëllimisht përhapin lajme të rreme për arsye politike. Ai e mbylli replikën me një goditje të fortë, duke i thënë Zhupës: “Mua ti më dukesh si ruse, por nuk je ruse.”
Përplasja mes dy deputetëve nxori në pah tensionet politike dhe përplasjet mbi lirinë e medias dhe dezinformimin.
