Dita e fundit e debatit për buxhetin e shtetit në Asamblenë e Madhe Kombëtare Turke u shoqërua me tensione të forta dhe përplasje fizike mbrëmjen e së dielës, kur deputetë të Partisë për Drejtësi dhe Zhvillim (AK Parti) në pushtet dhe të Partisë Republikane Popullore (CHP), partia kryesore e opozitës, u përfshinë në një konflikt që degjeneroi në shkëmbim grushtesh.
Incidenti ndodhi gjatë seancës për buxhetin dhe zgjati rreth dhjetë minuta, duke detyruar kryetarin e Parlamentit, Numan Kurtulmuş, të pezullonte punimet, pasi forcat e sigurisë patën vështirësi në largimin e deputetëve të përfshirë. Pavarësisht kaosit, më pas Parlamenti miratoi përfundimisht Buxhetin e Qeverisë Qendrore për vitin 2026 me 320 vota pro dhe 249 kundër. Gjithashtu, Akti i Përgjegjshmërisë për vitin 2024 u miratua me 316 vota pro dhe 247 kundër. Sipas raportimeve, tensioni nisi pas një përplasjeje verbale mes deputetit të AK Parti-së nga Bursa, Mustafa Varank, dhe nënkryetarit të grupit parlamentar të CHP-së, Gökan Günaydin. Duke folur nga foltorja, Varank iu drejtua bankave të opozitës me deklarata provokuese, duke kritikuar kryetarin e CHP-së dhe premtimet elektorale të komunave të drejtuara nga kjo parti.
Përgjigjja e Günaydin ishte e menjëhershme dhe e ashpër, duke akuzuar mazhorancën se po përpiqej të krijonte polemika artificiale dhe po shpifte sistematikisht ndaj pushtetit vendor të opozitës. Situata u përkeqësua më tej kur në debat u përfshi edhe nënkryetari tjetër i grupit parlamentar të CHP-së, Ali Mahir Başarır, çka çoi në përshkallëzimin e tensionit. Shkëmbimet verbale u shndërruan fillimisht në shtytje dhe më pas në përleshje fizike mes deputetëve të dy kampeve. Disa ligjvënës u mblodhën në qendër të sallës, ndërsa rojet e sigurisë dhe deputetë të tjerë u përpoqën të ndanin palët. Përplasjet vazhduan edhe gjatë ndërprerjes së seancës.
Në momentin e incidenteve, në sallë ndodheshin edhe kryetari i CHP-së, Özgür Özel, si dhe kryetari i Partisë së Lëvizjes Nacionaliste, Devlet Bahçeli, por asnjëri prej tyre nuk ndërhyri drejtpërdrejt për të ndaluar përleshjen. Ngjarja ka nxitur reagime të shumta në opinionin publik dhe ka rihapur debatin mbi tensionet politike dhe etikën parlamentare në Turqi.
