Mesfushori i Juventus, Miralem Pjanic, ka zbuluar se ai ka refuzuar të transferohet te Tottenham në 2012-ën. Bardhezinjtë do të presin anglezët në Torino për ndeshjen e parë të 1/8-ve të Champions League, por Pjanic mund të zbriste në fushë me ekipin tjetër nëse do të kishte marrë një vendim të ndryshëm gjashtë vite më parë. Boshnjaku ka qenë një lojtar i Roma-s në atë kohë dhe Tottenham e ka kërkuar për të zëvendësuar Luka Modric, i cili u transferua te Real Madrid. “U krijua një mundësi”, ka thënë Pjanic për “Daily Telegraph”.
“Në atë moment u thashë atyre se isha i lumtur aty ku isha dhe kjo ishte arsyeja pse nuk nënshkrova. Mora një vendim duke përdorur kokën dhe e kam marrë për arsye shumë të mira”. Pjanic ka qenë një nga arsyet kryesore pse Juventus arriti në finalen e Champions League sezonin e kaluar dhe shpreson që këtë vit gjërat të shkojnë ndryshe për Juventus. “Jemi shumë të uritur dhe duam ta fitojmë. Gjithsesi, Tottenham është një ekip i madh”.
