Inspektorati Shtetëror i Mjedisit ka pezulluar aktivitetin për 100 biznese që operojnë në sektorin e përpunimit, grumbullimit dhe riciklimit të mbetjeve në Tiranë.
Bashkimi i Prodhuesve Shqiptarë dhe Shoqata e Ricikluesve, dje, gjatë një konference për shtyp, deklaruan se vendimi i Inspektoratit të Mjedisit për pezullimin e lejeve është i jashtëligjshëm. Kryetari i Bashkimit të Prodhuesve, Filip Gjoka, u shpreh se ky aksion është represiv, çka po dëmton financiarisht këto sipërmarrje.
Bizneset kërkuan heqjen e vendimit për pezullim të aktivitetit të tyre, në rast të kundërt, ata do t’i drejtohen Gjykatës Kushtetuese.
“Subjekte private prej muajsh vazhdojnë të jenë pre e një seri masash administrative arbitrare dhe të jashtëligjshme, që kanë kulmuar me revokimin dhe pezullimin e lejeve mjedisore dhe për rrjedhojë, ndërprerjen e aktivitetit të 100 subjekteve, duke nëpërkëmbur të drejtat kushtetuese për të ushtruar aktivitetin dhe atë të pronësisë private, duke dëmtuar rëndë financiarisht këto sipërmarrje. Në rast se do të vazhdojnë me heqjen e lejeve, dhe nëse këto masa represive do të shtrihen edhe në biznese të tjera, ata i pret falimentimi”, u shpreh Gjoka.
Bizneset u shprehën se bllokimet e lejeve nuk kanë bazë ligjore. “Bllokimet duhet të kenë një bazë ligjore. Unë, në qoftë se penalizohem, ka një ligj. Që të më hiqet licenca mjedisore, ose siç i thonë këta me fjalë të bukur, ‘pezullim’, është neni 66 te ligji i mjedisit, që ka një sërë pikash. Në rast se Inspektorati ka dhënë masa sipas atyre pikave dhe ne si biznes s’i kemi zbatuar, atëherë hajde më pri dhe kokën”, u shpreh Arben Resuli, sipërmarrës në sektorin e grumbullimit të mbetjeve.
Bizneset kërkuan të ndalet pezullimi i lejeve dhe të hapet rruga e dialogut, në rast të kundërt ata pohuan se do t’i drejtohen Gjykatës Kushtetuese.
“Të ndalet ky aksion represiv dhe diskriminues ndaj subjekteve private. Të rikthehet ligjshmëria duke anuluar vendimin për heqjen dhe pezullimin e lejeve mjedisore dhe licencave”, u shpreh Gjoka.
PANORAMA
