Një peticion ‘online’, me anë të të cilit kërkohet nga Kuvendi i Kosovës që marrëveshja për Demarkacionin me Malin e Zi të ratifikohet, dhe që iniciativat për rrëzimin e Gjykatës Speciale të mos kalohen, ka marrë mbështetje të madhe nga qytetarët.
I nisur nga drejtori i Gazetës Express, Berat Buzhala, peticioni PO demarkacionit, dhe JO anulimit të Gjykatës Speciale, është nënshkruar nga mbi 3.000 qytetarë.
Gjatë dy orëve të para, ky peticion është nënshkruar, përveç nga qytetarët e thjeshtë, edhe nga zyrtarë shtetërorë.
“Vendi po përballet me rrezikun e izolimit ndërkombetar. Kjo është një kërkesë për Kuvendin e Kosovës që ta ratifikojë marrëveshjen e demarkacionit me Malin e Zi si dhe ta ndalë idenë e shfuqizimit të Gjykatës Speciale”, ka thënë Buzhala, në arsyetimin për peticionin.
Peticionin ‘online’ mund ta nënshkruani duke dhënë emrin, mbiemrin, dhe adresën e postës tuaj elektronike, në këtë adresë: Te ratifikohet demarkacioni me Malin e Zi dhe te mos shfuqizohet Gjykata Speciale.
