Ambasadori i Bashkimit Europian, Luigi Soreca ka qenë i pranishëm mesditën e kësaj të hëne në aktivitetin e përurimit të sistemit elektronik të deklarimit të pasurive.
Në fjalën e tij përpara gazetarëve, Soreca ka vlerësuar luftën kundër korrupsionit të bërë në Shqipëri, sipas së cilit është një faktor kyç për zhvillimin ekonomik. Ai ka vënë theksin se është shumë i rëndësishëm sistemi elektronik i deklarimit të pasurisë, pasi është një tregues se Shqipëria e ka marrë seriozisht luftën kundër korrupsionit.
” Sot ditë e mirë për Shqipërinë. Dita kur Shqipëria tregon se luftën kundër korrupsionit, e ka seriozisht. Kjo është e rëndësishme edhe për zhvillimin e vendit. Kur korrupsioni prek administratën, viktima janë qytetarët. Kështu ulet reputacioni i vendit dhe do të ketë më pak investime. Jemi këtu që të mbështesim Shqipërinë në luftën kundër Korrupsionit. Komisioni Europian është drejt përfundimit të raportit 2018 ku do të pasqyrohet lufta ndaj korrupsionit. Media dhe shoqëria civile duhet të ndihmojnë në luftën kundër korrupsionit”, u shpreh Soreca.
Ky projekt është një bashkëpunim mes Bashkimit Europian, Këshillit Europian, USAID dhe ILDKPI. Qëllimi i tij është ulja e korrupsionit në sektorin publik, mbështetja e organizatave civile dhe mbështetja e medias për të bërë publike rastet e korrupsionit. Përfaqësuesja e USAID deklaroi se ky projekt shënon një progres, por mbetet shumë punë për të ardhmen.
Nga ana tjetër, në fjalën e saj, përfaqësuesja e Këshillit të Europës, Juta Guckov tha se ky sistem elektronik ka qëllim monitorimin e deklaratavë të pasurive për të dhënë indicie për korrupsionin, krijon prova për Prokurorinë, por edhe informacion për mediat.
