Ylli i TikTok-ut, Tucker Genal, ka ndërruar jetë në moshën 31-vjeçare, ndërsa dyshohet se mund të ketë bërë vetëvrasje.
Genal kishte rreth 2.5 milionë ndjekës në TikTok dhe ishte i njohur për skeçet dhe sfidat që ndante me ndjekësit e tij. Postimin e tij të fundit në TikTok e publikoi vetëm pesë ditë para vdekjes.
Sipas ‘The Sun’, në atë video, ai ndau një seri fotografish nga çdo muaj i vitit të kaluar. Mbishkrimi i videos ishte: “Do të doja të mund t’i përjetoja disa nga këto momente dy herë.” Imazhi i fundit ishte një fotografi bardhë e zi.Vëllai i tij, Carson Genal, ka udhëhequr homazhet në rrjetet sociale.
“Nuk di as nga t’ia filloj. Ti ishe shoku im më i mirë dhe një vëlla i madh edhe më i mirë. Gjithë jetën time e kam kaluar duke të admiruar dhe duke u përpjekur të ndjek hapat e tu, sepse ti ishe gjithmonë heroi im,”shkroi ai në Instagram.
“E di që një gjë është e sigurt: do ta kaloj pjesën tjetër të jetës sime duke të admiruar, derisa të takohemi përsëri. Ti ishe personi më i sjellshëm që kam takuar ndonjëherë dhe vëllai më i mirë që dikush mund të kishte,” shtoi ai.
Genal kishte postuar edhe në Instagram vetëm disa ditë para vdekjes së tij. Ai ndau një fotografi me temë festive, ku shfaqej përkrah mikut të tij, Sean Schutt. Të dy shiheshin të ulur në prehrin e Babagjyshit.
Schutt, gjithashtu një TikToker i njohur për skeçet e tij, shkroi në mbishkrimin e postimit: “Mund ta ndiej frymën e Krishtlindjeve nga koka deri te veshtullat.”
Genal e rishpërndau më pas fotografinë në faqen e tij. Schutt e përshkroi Genalin si mikun e tij më të mirë në botë.
“Nuk e di ku do të kisha qenë pa ty, shoku im. Ti më dhe jetë. Më tregove sa e bukur mund të jetë jeta. Jam shumë i bekuar që të kam pasur në jetën time. Do ta kujtoj çdo moment dhe çdo kujtim që ndamë së bashku. Faleminderit që ishe gjithmonë aty për mua kur nuk dija ku të shkoja”, shkroi miku i tij në instagram.
Edhe YouTuber-i Zach Justice reagoi ndaj lajmit, duke e përshkruar Genalin si një person jashtëzakonisht të sjellshëm.
“Nuk mund ta besoj këtë. Ju lutem, kontrolloni miqtë tuaj. Gjithë dashuria ime për të, familjen e tij dhe për të gjithë ata që e donin”, tha ai.
