*Personazhi i javës
Midis gjithë zhurmës politike dhe aktualitetit në vend, java që lamë pas e zhvendosi tjetërkund vëmëndjen.
Ndonëse shumë larg prej Shqipërisë, të gjithë flisnin vetëm për një person dhe ajo ishte padyshim këngëtarja Jonida Maliqi.
Pjesëmarrja e saj në “Eurovision”, do të ishte si e çdo këngëtareje tjetër. Fillimisht të performonte mirë e më pas të kualifikohej për në finale, moment ky që vitet e fundit ka qenë disi problematik.
E megjithatë, Jonida u shfaq e sigurt.
Vëmendja tek ajo shkoi menjëherë sapo në mbrëmjet para nisjes së kompeticionit, ajo veshi një fustan aspak të zakontë.
E në fakt, kjo nuk është e rrallë për Jonidën pasi kushdo që I pi kafet e mëngjesit në Bllokun e famshëm të Tiranës, do e shohë të kaloj si në pasarelat e modës dhe me siguri do e komentoj gjatë pas kësaj.
Ishte pikërisht kjo natë, kur Jonida, siç do thonin gjyshet tona, “ra sysh” dhe në intervistat e saj për gazetat, televizionet dhe mediat ndërkombëtare foli një anglishte jo të mirë.
Prej aty, mëngjesin tjetër, çdo portal, media kishte videot e Jonidës e cila në fakt dukej më e çiltër se zakonisht dhe nuk shfaqej asfare e shqetësuar për ato çka thonte.
E kështu, Jonida Maliqi u bë shpejt meme, por nga ato të padëmshmet sigurisht.
Të gjithë po prisnin një reagim të sajin por asgjë. Më moskokëçarëse se kurre, këngëtarja vijoi me intervistat dhe në natën e dytë të festivalit bëri një përformancë drithëruese.
E siç ndodh gjithmonë në Shqipëri, po ata që e kishin tallur i thanë edhe bravo në statuse, komente, story apo edhe tavolina midis miqsh.
Ndërkohë që memet vijonin, Jonida arriti të kualifikohej mrekullisht.
Prej aty, të gjithë u duk sikur heshtën. Pak e prisnin, shumë e donin Jonida mundi që me këngën “Ktheju Tokës” të ishte e para në shumë prej sondazheve online.
Prej këtej, besimi u rrit dhe bashkë me to edhe një dashuri e “çuditshme” për Jonidën.
Në natën finale, edhe pse e gjithë Shqipëria ishte tallur me anglishten e saj, Jonida hyri në skenë dhe bëri shqiponjën.
Po të njëjtën që u mërziten dhe “sikletosën” (siç shkruanin) nga anglishtja e saj, u mërzitën se përse nuk doli “edhe aq mirë” në kompeticion.
Edhe pse nuk arriti të fitonte, dhe doli vetëm në vendin e 18, Jonida Maliqi dhe ky “Eurovision” që lamë pas do të na kujtojmë gjithnjë shprehjen se shqiptarët… të vrasin ditën e të qajnë natën.
Përgatiti: AlpeNews.al
