Presidenti i Armenisë, Armen Sarkissian ka refuzuar që ta nënshkruajë vendimin për shkarkimin e shefit të ushtrisë, i cili më 25 shkurt u shkarkua nga kryeministri Nikol Pashinian, gjë që nxiti krizë politike.
Sipas deklaratës së postuar më 27 shkurt në ueb-faqen e Presidencës, thuhet se Sarkissian e vlerësoi shkarkimin e gjeneralit Onik Gasparian si veprim jokushtetues.
Ky vendim i presidentit i jep Pashinianit afat prej pesë ditësh, ku brenda kësaj periudhe, kryeministri armen, mund ta dërgojë sërish te presidenti urdhrin për shkarkimin e gjeneralit.
Megjithatë, Pashinian, menjëherë pas këtij vendimi të presidentit njoftoi se ka dërguar sërish të njëjtën kërkesë te Sarkissian.
Pashinian shkroi në Facebook se vendimi i presidentit Sarkissian “aspak nuk ndihmon në zgjidhjen e situatës”.
Tani, presidenti Sarkissian ka tri ditë afat për të nënshkruar urdhrin apo që këtë çështje ta dërgojë për shqyrtim në Gjykatën Kushtetuese.
Në deklaratën e tij, Sarkissian theksoi se ai nuk mbështet asnjëherë palë sa i përket çështjes së shkarkimit të Gasparianit dhe shtoi se “Forcat e Armatosura duhet të mbajnë neutralitetin politik”.
Ndërkaq, gjatë një tubimi të opozitës të mbajtur në Jerevan, ish-kryeministri Vazgen Manukian, i cili është propozuar si person që mund ta zëvendësojë Pashinianin, tha se me këtë vendim, “presidenti qëndron përkrahë ushtrisë”.
“Shpresoj që të shohim deklarata nga policia dhe nga shërbimi kombëtar i sigurisë se edhe ata janë në anën e ushtrisë”, tha ai.
Pashinian tha se ai ka shkarkuar gjeneralin Gasparian, pas asaj, që ai cilësoi si tentim grusht shteti, për ta rrëzuar atë nga pushteti.
Ushtria e Armenisë ka kërkuar dorëheqjen e Pashinianit lidhur me mënyrën se si ai ka menaxhuar konfliktin gjashtëjavor të vitit të kaluar në mes të Azerbajxhanit dhe forcave etnike armene, mbi rajonin e Nagorno Karabakut.
Pashinian, koalicioni i së cilit ka shumicën në parlament, ka refuzuar kërkesën e opozitës që të mbahen zgjedhje të parakohshme./REL
