Ahmad Hamzeh, deputet iranian, ka njoftuar një dhuratë prej tre milion dollarësh në këmbim të ‘kokës’ së Presidentit Amerikan, Donald Trump.
Shpërblimi është për “këdo që vret Trump”, – tha Hamzeh, anëtar i parlamentit për qytetin Kahnuj, në provincën e Kerman, vendlindja e gjeneralit Qassem Soleimani, kreu i forcave speciale të Kudsit dhe i vrarë nga një sulm me dronë amerikanë më 3 janar.
“Unë deklaroj në emër të popullit të Kerman se të gjithë qytetarët janë ushtarë të Qassem Soleimanit dhe se askush nuk ka frikë nga martirizimi. Ne do t’i japim kujtdo që vret Trump tre milion dollarë”, tha Hamzeh gjatë fjalimit të tij në parlament.
Politikani iranian kërcënoi gjithashtu Shtetet e Bashkuara, bazat e saj ushtarake dhe ambasadat e tyre në rajon duke thënë se “Ju do ta shijoni këtë realitet. Dëshmori Qassem Soleimani është shumë më i rrezikshëm se Haj Qassem Soleimani”, duke nënkuptuar se vdekja e udhëheqësit ushtarak ka një efekt të gjerë.
