Procesi i përzgjedhjes së kandidatëve për deputetë të Partisë Demokratike ka ngjallur edhe një lloj debati në distancë mes ish-kryeministrit Berisha dhe Genc Rulit.
Ky i fundit është aktualisht Anëtar i Komisionit të Vlerësimit të emrave që mund të jenë në listën e demokratëve në zgjedhjet e 25 prillit.
Sot në një intervistë për “Abc News”, Ruli theksoi se angazhimi i Berishës në politikën aktive nuk përbën domosdoshmëri për të vijuar misionin.
Më herët ai i ka kërkuar publikisht që të mbyllë ciklin e tij në Partinë Demokratike për t’i lënë vendin brezave më të rinj.
“Unë fola çfarë mendova për veten time si Genc Ruli. Jam në të njëjtën kohë me Berishën dhe e theksova se Berisha ka kontribut. Edhe sot ka kontribut. T’i flasë demokratëve dhe të djathtëve. Ka goxha kontribut sepse është një njeri që nuk i shteron influenca. Angazhimi jonë në politikën aktive dhe profesionale nuk është i nevojshëm dhe i detyrueshëm për të vazhduar misionin tonë. Misioni jonë mjafton edhe me një deklaratë publike, edhe me një intervistë publike apo edhe me një përshëndetje që i bëjmë anëtarëve të partisë. Pra nuk shoh kontradita në ato që kam thënë. Unë ndjehem i lirë me veten time në këtë gjykim, prandaj bëra atë formulim që besoj jam mirëkuptuar edhe nga Berisha dhe nga shumë persona që e njohin Partinë Demokratike nga brenda“, u shpreh Ruli.
Gjithçka nisi pas deklaratës së Genc Rulit për Sali Berishën, i cili tha për Rulin: “Lavdia e zotit Berisha do të mjaftonte për dy jetë, jo për një, por ai është një njeri energjik, pa diskutim. Por i takon atij të shprehet për këtë gjë. Secili duhet të dijë ta ruajë vetë lavdinë dhe shkëlqimin e tij. Ti vendos që karriera ime politike ka qenë e vrullshme, ka kaluar në të gjitha kulmet e saj, sot është dita që unë ta mbyll, për të mos ta mbyllur të tjerët ty.”
Për këtë deklaratë, ish-kryeministri u shpreh në emisionin “Çim Peka live” se Genc Ruli, është viktimë e mençurisë së tij. Berisha tha se ai ngatërron dy gjëra elementare, betejën me karrierën.
