Kanë shkuar për të inspektuar bashkërisht situatën në terren, por kanë përfunduar me përplasje dhe akuza direkte.
Kryetarja e Bashkisë së Shkodrës Voltana Ademi është shfaqur e indinjuar me prefektin e qarkut Shkodër Çesk Millja, ndërsa në qendër të debatit ka qenë mungesa e informacionit për shkarkimet nga hidrocentralet, të cilat sipas kryebashkiakes janë më të larta sesa deklarohen.
“Rrritja e niveli të lumit Buna a është për shkak të shkarkimeve apo jo? Dua një përgjigje të ndershme” – iu drejtua Ademi prefektit.
“E vërteta është se ka rënë shi në Shkodër dhe në të gjithë veriun” – tha prefekti Millja, por Ademi ia preu se kjo ishte përgjigja më e pandershme dhe më e turpshme që mund të jepte një përfaqësues i shtetit.
“E vërteta është se rritjet janë për shkak të rritjes së shkarkimeve të hidrocentraleve,” – vijoi Ademi.
“Çfarë janë personale, mbaji personale. Këto që po të them jan zyrtare” – i tha prefekti Ademit.
Duke pyetur një banor, ky i fundit i tha Ademit se kanalet punojnë mirë dhe se përmbytjet janë nga shkarkimet e hidrocentraleve, pasi shiu nuk mund të shkaktojë përmbytje të tilla.
“Është mungesë përgjegjësie dhe tallje me banorët të thuash se kjo ndodh për shkak të shirave dhe jo shkarkimeve në hidrocentrale,” – deklaroi Voltana Ademi.
Ademi nuk është mjaftuar me kaq por ka pyetur direkt banorët e zonës nëse tokat janë përmbytur nga reshjet apo shkarkimet.
Voltana Ademi ka bërë të qartë se kërkon transparencë, pasi nuk mund të lejojë që të shkatërrohen investimet në bujqësi, ndërsa askush nuk merr përgjegjësi.
Teksa reshjet vazhdojnë dhe po ashtu dhe shkarkimet, banorët janë të frikësuar nga përmbytjet e mundshme. Harta e përmbytjeve në Anën e Malit sa vjen e zgjerohet, ndërsa tokat bujqësore janë nën pushtimin e ujit.
