Policia e Shtetit, ka dalë me një apel zyrtar ndaj drejtuesit e mjeteve, duke kërkuar kujdes të shtuar në qarkullim për shkak të reshjeve të dendura të shiut që kanë përkeqësuar ndjeshëm kushtet e lëvizjes në disa akse kryesore të vendit.
Sipas uniformave blu, më problematike paraqitet segmenti interurban Tiranë–Durrës, ku prezenca e lartë e ujit në rrugë, ka vështirësuar qarkullimin e automjeteve, duke detyruar autoritetet të ndërmarrin masa për të menaxhuar trafikun. Policia u bën thirje, qytetarëve të shmangin lëvizjet e panevojshme deri në qetësim të situatës.
Njoftimi i policisë:
Apel për kujdes në rrugë ❗️
Për shkak të reshjeve të dendura të shiut, është vështirësuar qarkullimi i mjeteve në disa zona të vendit.
Në rrugën interurbane që lidh Tiranën me Durrësin, në zonën pranë karburantit në hyrje të Durrësit, ka prezencë të lartë të ujit në të dyja anët e lëvizjes, gjë që e bën të pamundur qarkullimin normal të mjeteve.
Për të shmangur trafikun dhe aksidentet, Policia Rrugore njofton se do të devijohet lëvizja si më poshtë:
📌 Automjetet që vijnë nga jugu në drejtim të Tiranës, të qarkullojnë nga Rruga e Plepave për në Ndroq dhe nga rruga “Rrogozhinë–Elbasan–Tiranë”.
📌 Për në Durrës, kalimi do të bëhet nga rruga e universitetit, në drejtim të Spitallës dhe në rrugën “Tiranë–Elbasan–Rrogozhinë”.
Policia apelon për drejtuesit e mjeteve që të shmangin lëvizjet e panevojshme, të tregojnë kujdes maksimal gjatë lëvizjes, të ndjekin udhëzimet e punonjësve të Policisë dhe të zbatojnë sinjalistikën rrugore.
Shërbimet e Policisë Rrugore dhe Patrullat e Përgjithshme po marrin masa për lehtësimin e qarkullimit të mjeteve dhe për të ndihmuar drejtuesit e mjeteve.
