Sali Berisha ka komentuar vendimin për përjashtimin me 10 ditë nga Kuvendi të Edi Palokës dhe Bujar Leskajt. Ish kryeministri në një konferencë për mediat tha se Parlamenti po trajtohet nga kryetarja e saj “si dyqani i Lindës”. Por ai garantoi se opozita do i përgjigjet mazhorancës.
“Unë prej kohësh kam folur për dyqanin e Lindës. Parlamenti trajtohet thjesht si dyqani i Lindës.
Kryetarja është një zonjë dhe mua në gjithë rastet më takon të vetëpërmbahem në qendrimet publike ndaj një zonje se nuk mund të tejkaloj disa standarte por në mënyrë të përsëritur i kam thënë që ti në këtë mënyrë do e cosh parlamentin drejt zhvillimeve shumë të rënda të paparashikueshme.
Ajo është viktimë e Ramës ndaj ne as kemi marrë as kemi ndërmend të marrim nisma kundra saj.
Përjashtimi i dy deputetëve është një akt jashtazakonisht i rëndë dhe opozita do i përgjigjet, kjo nuk ka dyshim. Ju garantoj që opozita do i përgjigjet.
Se nga një anë ke një njeri me një fjalor stërordiner që thotë fjalë që mua më vjen zor për ato zonja, se janë nëna, bashkëshorte, vajza, që ulin kokën e nuk thonë një fjalë, por ne do i përgjigjemi, prisni koha do e tregojë ne nuk mposhtemi.
Ne nuk bojkotojmë Parlamentin, nuk ka gjë më të vështirë se sa të shkosh në atë parlament e ku një qeveritar përdor atë fjalor të një rrugaci ordiner para gjithë asaj audience, gjithë shqiptarëve. Dëgjojnë një rrugac që thotë këto e ato, por dhe ne do i përgjigjemi”, tha Berisha.
