Gazetari gjerman i gazetës Bild, Peter Tiede, që prej publikimit të parë për blerjen e votave në Shqipëri, ka qenë shumë aktiv në prononcimet e tij pranë mediave të PD, por dhe me statuse të publikuara në rrjetet sociale.
Menjëherë pas publikimit të përgjimeve të sotme, të cilat i paralajmëroi një ditë më parë në një portal pranë PD, ai ka reaguar duke bërë një status në rrjetet sociale. Në të shfaqet si politikan, jo si gazetar, duke bërë disa përcaktime për qeverinë shqiptare. Por kjo pak rëndësi ka, pasi kjo është punë e tij.
Ajo që nuk bind në rrëfimin e tij, është përcaktimi i burimit të përgjimeve. Gazetari thotë se përgjimet i ka siguruar nga policia, ndërkohë që në Shqipëri përgjimet bëhen nga Prokuroria. Pra, në ketë rast, ai është duke gënjyer.
Arsyet i di vetë ai. Fakt është se këto përgjime janë në duart e opozitës shqiptare prej kohësh dhe një pjesë prej tyre i ka nxjerrë nëpërmjet Klodiana Lalës te Zëri i Amerikës.
Përgjimet e tjera, për të pasur një jehonë sa me të madhe, me argumentin e investigimit të mediave te huaja, ja kanë dhënë gazetarit të Bild për t’i botuar.
Dhe ndryshe nga çfarë u pretendua, se në përgjime ndodhej edhe Rama, ai nuk është asgjëkundi aty. Me përjashtim të rastit kur Abdylaj pyet Dakon a u kënaq kur udhëtoi me Ramën.
Më poshtë statusi i Peter Tiede menjëherë pas publikimit të përgjimeve të sotme.
“Për shkak se qeveria në Shqipëri e mohon kaq ashpër se mafia ble votat: disa përgjime për t’u dëgjuar- të marrë nga policia. Deri më sot të pabërë publike.
Baroni i drogës, që shfaqet në audiopërgjim u arrestua për trafik heroine- dhe u lirua sërish- pasi u depresionua në burg dhe mori një certifikatë siç i kërkohej.
Të mëdhenjtë duan të jenë të lirë në Shqipëri- ata paguajnë mirë dhe sigurojnë vota.
Pyetja e vetma është: A e manipulon mafia politikën apo ajo e qeveris vendin?
Përshtypja ime: Ajo e qeveris vendin.
Një hetues më ka thënë: Ne e humbën luftën, mafia e drogës e mori në dorë shtetin tonë.
Për shkak se disa policë dhe prokurorë nuk duan të dorëzohen, sepse duan të veprojnë kundër udhëheqjes së korruptuar policore, ne arritëm të sigurojmë materialin.
Falënderimet e mia për hetuesit e guximshëm dhe gazetarët inteligjentë në Shqipëri, të cilët nuk po heqin dorë”, shkruan Tiede.
