Kryeministri i Kosovës, Ramush Haradinaj, ka hedhur poshtë disa raportime në media, të cilat flasin për emigrim masiv të të rinjve kosovarë.
Përmes një postimi në facebook, shefi i qeverisë së Kosovës deklaron se shifrat e pretenduara nuk janë reale dhe dëmtojnë procesin e liberalizimit të vizave për Kosovën.
Referuar shifrave zyrtare, Haradinaj flet jo vetëm për rënie të kërkesave për emigrim gjatë 2018 por edhe për kthim vullnetar të qytetarëve që emigruan gjatë 2015.
E kjo sipas tij është tregues se qytetarët e Kosovës respektojnë parimet bazë të lëvizjës së lirë.
Haradinaj: “Në disa media po jepen të dhëna të pasakta lidhur me migrimin e popullsisë së Kosovës, kryesisht të rinjve tanë. Statistikat e fundit reale të migrimit, tregojnë se Kosova nuk përbën rrezik të migrimit, duke shënuar trendin më të vogël ndër vite me vetëm 3515 raste të kërkesave për migrim në vitin 2018, krahasuar me vitin 2015, kur kishin e migruar 67.545 persona. Ndërsa, në vitin 2018, janë rikthyer vullnetarisht 727 qytetarë të Kosovës. Kjo tregon qartë rënie të lartë të migrimit dhe se qytetarët e Kosovës respektojnë parimet bazë të lëvizjës së lirë.
Të dhënat e pasakta, me ose pa qëllim, dhe manipulimi me shifrat e aplikimeve për viza, të cilat në shumicën e rasteve janë viza turistike, zyrtare dhe të punës, dhe vizita e bashkime familjare, për të cilat qytetarët aplikojnë njëkohësisht në disa ambasada dhe të njëjtit edhe disa herë brenda vitit, e dëmtojnë rëndë procesin e liberalizimit të vizave.”
