Federata Shqiptare e Futbollit ka publikuar sot listën e kandidatëve për organet drejtuese të futbollit shqiptar, respektivisht për zgjedhjen e Presidentit të FSHF-së, dhe anëtarëve të KE-së për katër vitet e ardhëshme.
Ajo që ra në sy tek antarët e Komitetit Ekzekutiv ishin personazhet e shumtë që vinin nga rradhët e politikës, duke parë një mungesë të madhe të njerzëve që i përkasin botës së futbollit.
Një pjesë e kandidatëve merren me politikë duke pasur funksione drejtimi tek Partitë ku ata bëjnë pjesë.
Një nga emrat që spikat është ai i Enkelejd Alibeajt, që aktulisht është deputeti i Partisë Demokratike në qarkun e Fierit.
Alibeaj është propozuar për të qenë anëtar i Komitetit Ekzekutiv nga ana e skuadrës së Bylysit.
Një tjetër emër që është pjesë e një partie politke dhe po Partisë Demokratike është ai i Erald Kaprit.
Kapri është pjesë e zyrës së shtypit në Partinë Demokratike, ndërsa punon dhe si pedagog.
Një tjetër emër që është i po të njëjtës Parti, është dhe ai i Genci Gjylsheni.
Gjylsheni është Drejtori i Kultures, Trashegimise Kulturore, Turizmit dhe Sporteve në Bashkinë Kavajë që drejtohet nga Partia Demokratike.
Ekrem Spahiu është një tjetër emër që vjen nga rradhët e politikës ku më parë ka qenë pjesë e Partisë Levizja e Legalitetit.
Më pas ai u emërua drejtor i përgjithshëm i klubit të Kukësit ku qëndroi për pak kohë në këtë detyrë.
Ndërsa, Eridian Salianji i përket Partisë Socialiste ku punon si avokat i PS-së në Komisionin Qëndror të Zgjedhjeve.
Në kohën që Armando Duka dhe të gjithë njerzit pranë tij bëjnë thirrje që gara të mos jetë e politizuar, një pjesë e emrave që vijnë për të qenë anëtarë të Komitetit Ekzekutiv janë pikërisht nga rradhët e PD-së që është dhe aleatja më e madhe e Dukës në këto zgjedhje që do të zhvillohen më datë 7 shkurt në qytetin e Durrësit.
