Sekretari i Përgjithshëm i LSI-së, Endrit Braimllari ka deklaruar sot se përfaqësuesit e kësaj force politike i kanë kërkuar kreut të PD-së, Lulzim Basha që mos të tradhtojë kauzën e opozitës për interesa personale.
Sipas Braimllarit koha do të tregojë nëse ka një marrëveshje të fshehtë Rama-Basha, ndërsa thekson se LSI ka kërkuar vetëm korrektesë nga kryedemokrati Lulzim Basha.
Ai u shpreh ndër të tjera se LSI nuk ka bërë kërkesë për grup parlamentar.
“I kemi kërkuar të mos tradhëtohen interesat e opozitës për interesa personale apo interesa të Edi Ramës. Ne nuk kemi kërkuar as deputetë të caktuar për të pasur grup parlamentar, e vetmja gjë që kemi kërkuar ka të bëjë që mos të tradhëtohen interesat e opozitës për interes të Ramës.
Është koha që do ta tregojë nëse ka një marrëveshje mes Ramës dhe Bashës! LSI është koherente në qendrimet e saj, nuk ka asnjë kërkesë të LSI-së për grup parlamentar. Ne jemi forcë opozitare, për ne ka rëndësi që të 4 përfaqëësuesit e LSI janë një zë i fortë i atyre që përfaqësojnë.
LSI ka vendosur që të qendrojë në opozitë parimore dhe marrja e vendimeve tona në opozitë ka qenë vendimarrje e cila në disa raste bëhej për të ruajtur frymën opozitare. Kërkesa e vetme që LSI ka adresuar kundrejt kryetarit të PD ka të bëjë me faktin që të mos tradhëtohet kauza e opozitës për interes të Edi Ramës. Ne kemi qendruar korrekt dhe të pastër në opozitë. LSI nuk ka kërkuar nga kryetari i PD-së asnjë deputet shtesë, ajo çfarë kemi kërkuar është që të qendrojmë korrekt dhe mos t’i tradhëtojë për interesat e opozitës për interesa personale”, u shpreh Braimllari në Report Tv.