Në një ceremoni festive, ku nuk munguan simbolet e festave të nëntorit, kryetari i bashkisë Elbasan, Qazim Sejdini bëri një pritje nderimi për të gjithë aktorët e regjisorët, artistë të teatrit “Skampa”, drejtues të Qendrës së Artit dhe të gjithë ata që japin kontributin e tyre për pasurimin e jetës artistike e kulturore të Elbasanit.
Kohët e fundit Qendra e Artit në Elbasan, ka pasur një performancë të shkëlqyer, duke “rrëmbyer” disa çmime me radhë, në evente të organizuara brenda vendit dhe në trojet shqiptare.
Kryetari i Bashkisë, Qazim Sejdini uroi artistët dhe organizatorët për punën e shkëlqyer duke i dhënë Elbasanit vendin që meriton si qyteti i kulturës dhe dijes.
Drejtori i Qendrës së Artit përgëzoi bashkinë e Elbasanit për mbështetjen dhe veçanërisht angazhimin personal të kryetarit të bashkisë në mbështetje të çdo organizimi artistik dhe kulturor në qytet.
Premiera “Volpone” triumfoi me katër çmime në Festivalin Teatror “Kadri Roshi” në Gjirokastër. “Shfaqja më e mirë”, “Regjia më e mirë”, “Aktori më i mirë” dhe “Aktorja më e mirë jo protagoniste”.
Ansambli “Isuf Myzyri” fitoi çmimin e parë në festivalin “Brumi i Jetës në Gjirokastër”; çmimin e parë në Festivalin Kombëtar të Këngës Popullore Qytetare, Elbasan; çmimin e parë në Festivalin e Këngës Qytetare në Prizren.
Orkestra e Harqeve mori çmimin e parë në Takimin Kombëtar të Harqeve, Elbasan.
Banda “Afërdita” u nderua me çmimin e parë në Festivalin Ndërkombëtar të Bandave në Shkodër.
Në festivalin Kombëtar të Teatrit, i cili u zhvillua në Teatrin Kombëtar në Tiranë, shfaqja “Babai” mori çmimin e aktorit më të mirë, me të papërsëritshmin Reshat Arbana.
