Kreu i agjencisë së brendshme të inteligjencës gjermane paralajmëroi për rritjen e aktivitetit nga shërbimet sekrete ruse.
“Interesi i inteligjencës ruse këtu në Gjermani, jo vetëm që është i pandërprerë, por gjithashtu po rritet ndërsa efektet e luftës vazhdojnë”, tha për agjencinë gjermane të lajmeve DPA, Thomas Haldenwang, shefi i Zyrës Federale për Mbrojtjen e Kushtetutës.
“Rasti aktual tregon gjithashtu se sa real është rreziku i spiunazhit rus”, shtoi Haldenwang, duke iu referuar agjentit të dyshuar të dyfishtë, i cili u arrestua për furnizimin e Rusisë me informacione sekrete para Krishtlindjeve.
Ai gjithashtu pret që Moska të përpiqet të kompensojë dëbimin e 40 zyrtarëve rusë të konsideruar persona non grata nga Gjermania.
“Ne po bëjmë përpjekje të mëdha për të parandaluar që njerëz të tjerë që mund të jenë të lidhur me shërbimet ruse të vijnë këtu në Gjermani”, tha ai.
Ai shtoi se ka një rritje masive të sulmeve kibernetike ruse, fushatave të dezinformimit dhe metodave të tjera që synojnë të ndikojnë në opinionin publik.
