Sindikata e punonjësve të Universiteteve të Shqipërisë (SPUSH) ka bërë një thirrje për pjesëmarrjen e ditës së nesërme në lidhje me rritjen e pagave dhe kërkesave të tjera që ata kërkojnë të merren parasysh.
Ata thonë se të gjithë profesorët dhe studentët që duan të vazhdojnë misionin e tyre, sot duhet të bëhen bashkë për ta bërë këtë profesion të mirëpaguar.
“Le ta bëjmë këtë godinë Simbolin e Qëndresës Akademike! Të nderuar drejtues të IAL-ve publike! Lutemi të qëndroni në lartësinë e detyrës/funksionit tuaj akademik, duke mos penguar apo intimiduar pjesëmarrjen në këtë protestë të stafit”, shkruhet në deklaratë.
Deklarata e plotë
Le të bëhemi këtë herë të gjithë bashkë në emër të misionit tonë akademik. Të gjithë profesorët që dëshirojnë që studentët nesër të vazhdojnë misionin e tyre, sot duhet të bëhen bashkë për ta bërë këtë profesion misionar të mirëpaguar.
Në datën 5 Tetor, ora 11:00, le të bëhemi të gjithë bashkë për të demonstruar se misioni ynë i përbashkët akademik nuk mbetet vetëm brenda mureve të auditoreve. Do na duhet të jemi të gjithë bashkë, jo thjesht për kërkesa ekonomike, por për një vlerësim dinjitoz të punës sonë. Nuk po kërkojmë thjesht rritje të pagave, pasi vlera e punës tonë do të jetë gjithmonë më shumë se çdo vlerë monetare.
Misioni ynë akademik nuk ka njësi matëse! Ju bëjmë me dije se do të qëndrojmë fort për të konkretizuar kërkesat tona legjitime në vlerësim të dinjitetit profesional, që ka për qëllim t’i shërbejë vetëm të mirës publike, larg interesit të politikës së ditës. Ftojmë kolegët e universiteteve në mbarë Shqipërinë të mbështesin Protestën e Datës 5 Tetor 2022, ora 11.00, para godinës së Universitetit Politeknik të Tiranës.
Le ta bëjmë këtë godinë Simbolin e Qëndresës Akademike! Të nderuar drejtues të IAL-ve publike! Lutemi të qëndroni në lartësinë e detyrës/funksionit tuaj akademik, duke mos penguar apo intimiduar pjesëmarrjen në këtë protestë të stafit.
Note: Në vëmendjen tonë është mbrojtja e të drejtave të çdo pjesëmarrësi në protestë. Në anën tonë kemi vetëm të drejtën dhe ligjin. Sipas nenin 197, pika 4, të Kodit të Punës “Ndalohet çdo veprim që përfshin shtrëngim, cënim ose diskriminim ndaj punëmarrësve për shkak të pjesëmarrjes apo jo në grevë”.
KRYESIA E SINDIKATËS SË PUNONJËSVE TË UNIVERSITETEVE TË SHQIPËRISË