Selia blu pritet të marrë një fytyrë të re në përfundim të punimeve në ambientet e brendshme dhe fasadën kryesore të godinës.
Partia Demokratike duket se po fiton një identitet të ri, jo vetëm në formë por edhe në përmbajtje.
Burime të gazetës “Panorama” që u futën në ambientet e brendshme të selisë blu konfirmuan se në korridorin e godinës në katin e parë janë hequr disa foto të mëdha që ndodheshin në muret anësore në të djathtë dhe në të majtë të korridorit.
Bëhet fjalë për postera që paraqesin momente të suksesshme të qeverisë së ish-kryeministrit Sali Berisha, të tilla si futja në NATO, apo inaugurime të veprave të rëndësishme.
Gjurmët e të kaluarës janë venitur dhe tanimë në ambientet e brendshme të selisë blu kanë zënë vend sloganet “Zgjedhim të Ardhmen”.
Bëhet fjalë për slogane të formatit që u përdorën në Kuvendin e 18 dhjetorit, të thirrur nga kryedemokrati Basha. Ndërkohë që mësohet se të gjitha ambientet e brendshme të selisë po lyhen me bojë.
Gazeta “Panorama.al” mëson se në ambientet e brendshme të selisë nuk janë instaluar dyer të blinduara apo hekura për të pamundësuar hyrjen. Ndarja me Sali Berishën duket përfundimtare, e duket se kreu i PD-së Basha kërkon të reflektojë një filozofi të re, duke larguar çdo kujtim të ish-kryeministrit nga godina e demokratëve pas shpalljes ‘non grata’ dhe konfliktit frontal për PD-në.
