Nuk zgjati më tepër se një ditë tarifa e vendosur nga qeveria e Kosovës për dezinfekimin e kamionëve në pikat doganore.
Me hapjen e pikave kufitare ditën e sotme, shoferët që hynë në Kosovë u përballën me një tarifë të re, atë të dezinfektimit të mjetit, si masë kundër koronavirusit, që varionte 17 euro deri në 22 euro për kamionat.
Por pas revoltës së qytetarëve, radhëve të gjata të krijuara në pikat doganore dhe reagimit të kryeministrit Edi Rama, i cili e quajti veprim të çuditshëm i Albin Kurtit, Ministria e Brendshme e Kosovës ka vendosur të heqë këtë tarifë.
“Dezinfektimi i kamionëve parashihej në kuadër të masave për luftimin e pandemisë së COVID-19. Nga ky moment importuesit nuk kanë nevojë t’i dezinfektojnë maunet në pikat kufitare”, thuhet në njoftimin e MPB-së.