Media prestigjioze britanike “The Independent” ka publikuar një artikull për kryeqytetin shqiptar, Tiranën. Përmes një guide me foto “The Independent” ka përzgjedhur pikat që duhet të vizitohen në Tiranë nga turistët, mes tyre dhe muzeumi Bunk’Art 1 dhe 2.
“Pas dekadave të izolimit, vendi i fundit i pazbuluar i Evropës po ecën drejt modernizimit dhe tërheqjes së vizitorëve. Në zemër të këtij plani është Tirana” shkruan prestigjozja britanike.
“The Independent” ka përzgjedhur Bunk’Art si një prej vendeve unike që nuk duhen humbur pa u parë edhe gjatë stinës së dimrit.
“Bunk-Up” e kanë cilësuar ata bunkerin për mbrëmjet e Bunk’Rock që janë mbajtur brenda sallës së madhe në Bunk’Art 1 ku muzika rrok ka tërhequr vizitorë të shumtë në ish-bunkerin anti-atomik të Diktaturës.
“Bunk’Art 1 dhe 2 janë ish-strehët anti-bombë të ndërtuara nga regjimi i Hoxhës, të cilat tashmë janë shndërruar në ekspozita dhe hapësira për evenimente ku është ndërthurur arti dhe objektet historike të ekspozuara. Ja vlen një vizitë në këto dy bunkerë “të frikshëm” prej betoni. Bunk’Art 1 që është më kryesori dhe më i madhi ka edhe teatrin e vet në brendësi”, shkruan “The Independent”.
