Është rritur mbi 700 bilanci i viktimave që u goditën rreth dy javë më parë nga cikloni vdekjeprurës “Idai” në Afrikën e Jugut.
Por katastrofa humanitare tanimë i ka lënë vendin sëmundjeve të ndryshme infektive, si malarja apo kolera, që po kërcënojnë seriozisht të gjithë komunitetin.
Autoritetet në Mozambik konfirmuan të mërkurën pesë rastet e para të kolerës në qytetin e varfër portual të Bejrës.
Për shkak të natyrës epidemike të sëmundjes, numri i pacientëve vetëm pritet të rritet me kalimin e ditëve.
“Sot presim rreth 100 apo 200 persona me heqje akute të barkut, e cila mund të jetë një nga simptomat e sëmundjes. Në total kemi trajtuar rreth 2,700 raste. Sigurisht që numri i pacientëve do të rritet pasi kolera është një epidemi, por po punohet intensivisht që të ofrohet ujë i pijshëm i pastër për banorët dhe të parandalohet përhapja e sëmundjes.”
Kolera shfaqet me pezmatim të zorrëve, ethe dhe heqje të vazhdueshme të barkut, gjendje shëndetësore e cila pa u kuruar mund të shkaktojë vdekjen brenda disa orëve.
Sëmundja në zonë mendohet të jetë përhapur nga përmbytja e puseve të ujit, të cilat për shumë banorë të fshatrave mbeten burimi kryesor i ujit të pijshëm.
Organizata Botërore e Shëndetit ka njoftuar shpërndarjen në fundjavë të rreth 900 mijë vaksinave kundër kolerës që merren përmes gojës.
Vetëm në Mozambik numri i viktimave nga cikloni i 14 marsit ka arritur në 470, ndërsa mbi 230 të tjerë janë shënuar në shtetet e Zimbabvesë dhe Malauit.
Përmbytjet si pasojë e erës ciklonike kanë lënë pasoja kastrofike në një sipërfaqe rreth 3 mijë metra katrorë të Afrikës Jugore dhe kanë zhvendosjen qindra mijëra vetë.
