Lajmi se ish Prokurori i Përgjithsëm i Shqipërisë Adriatik Llalla është zyrtarisht nën hetim për “pastrim parash në përmasa të mëdha” është dhënë për herë të parë nga “Alpenews.al” në orën 12:07 të së premtes së 10 ditëve më parë, në datën 16 mars 2018. Ka qenë vetëm një ditë pasi Prokurorja e Përgjithshme Arta Marku, ishte tek emisioni i Sokol Ballës në “Vizion+”.
Bashkë me lajmin janë dhënë çdo ditë detaje të reja rreth kësaj çështje. Me përjashtim të shumë pak mediave online dhe ndonjë varianti të tyre të printit që e pasqyruan këtë lajm të bujshëm, të tjerat heshtën.
Ndërsa sot, kush e ka ndjekur që në mëngjes pasqyrën e shtypit, ose ka parë tezgat dhe kioskat e gazetave, ka vënë re se të gjitha pothuajse e kanë të pasqyruar. Por çfarë ka ndodhur nga e premtja e 10 ditëve më parë e deri sot, që mediat të kalonin nga indiferentizmi tek kjo vëmendje dhe ky fokus i pazakontë për një lajm që në çdo vend tjetër të botës, do ishte kryefjala e të gjitha zhvillimeve?!
Eshtë dashur që media shtetërore gjermane “Deutsche Welle” të bënte një shkrim të zgjeruar rreth procesit të vettingut në Shqipëri ku të citonte edhe “Alpenews.al” dhe burime diplomatike në Tiranë, rreth hetimit zyrtar të ish Prokurorit të Përgjithshëm Adriatik Llalla për “pastrim parash në përmasa të mëdha”, që ky lajm të fitonte menjëherë qytetarinë dhe të bëhej pjesë e lajmeve kryesore të së dielës për onlinet dhe të së hënës pë të gjitha gazetat shqiptare.
Bashkë me fotot e një pjese të gazetave që e kanë botuar sot lajmin, po ripostojmë të plotë shkrimin e “DW” që u bë shtysa përfundimtare për botimin e lajmit për nisjen e hetimit zyrtar ndaj ish Kryeprokurorit.
Shkrimi i “Deutsche Welle”:
Tiranë – Vettingu ndez motorët për një gjyqësor pa ryshfet dhe korrupsion
Dalin rezultatet e para të prekshme të procesit të vettingut në Shqipëri. Në këtë mënyrë rritet shpresa për hapjen e negociatave të anëtarësimit.
Çmontim i kulturës së pandëshkueshmërisë
Lista me emrat e gjykatësve dhe prokurorëve që do kalojnë në sitën e vettingut është e gjatë, plot 800 syresh. Vetëm 2% ose 17 gjykatës dhe prokurorë dhanë dorëheqjen dhe u vetëpërjashtuan nga drejtesia, para se vettingu të fillonte, duke përfituar nga ligji i vettingut që ua jepte këtë mundësi. Por dorëheqja nuk u jep atyre imunitet për t’i shpëtuar drejtësisë pa i hyrë gjemb në këmbë, nëse kane kryer vepra penale, Drejtësia po tregon se po vepron në bazë të provave dhe fakteve. Rasti më domethënës është ai i ish- Prokurorit të Përgjithshëm Adriatik Llalla, ndaj të cilit Prokuroria ka hapur ҫështje penale për pastrim parash në përmasa të mëdha, edhe pse Llalla deklaroi para se të fillonte vettingu largimin vullnetar nga drejtësia. Atë që nuk e bëri dot organi i akuzës i drejtuar nga Llalla, që erdhi në krye të Prokurorisë në vitin 2012 dhe qëndroi deri në mbyllje të mandatit 5 vjeҫar, më 3 dhjetor 2017, e nisi Departamenti Amerikan i Shtetit. Muajin kaluar ai mori vendimin që ish-kryeprokurori dhe familja e tij të futen në listën e zezë dhe të mos u lejohet hyrja në SHBA “për shkak të përfshirjes së tij në raste të mëdha korrupsioni”.
Shqipëria pret hapjen e negociatave
Fakte dhe dokumenta zyrtare, të botuara në media, kanë bërë transparente për publikun shit-blerje tokash, ullishtesh, në sipërfaqje të mëdha dhe pasurish të paluajtshme që ish-Prokurori i Përgjithshëm i blinte shumë lirë dhe pasi bëhej rivlerësimi i tyre, i shiste 20-30 herë më shtrenjtë. Dokumentat zyrtare flasin për transaksione financiare me persona me precedentë penalë që lidhen me krime të rënda. Hetimi ndaj ish-Prokurorit të Përgjithshëm, Adriatik Llalla është një sinjal se për kulturën e pandëshkueshmërisë, të betonizuar në Shqipëri prej më shumë se dy dekadash, po fillon procesi i ҫmontimit. Burime diplomatike në Tiranë, që ndjekin nga afër këtë process thanë për DW se rasti i ish-Prokurorit të Përgjithshëm është vetëm fillimi i kapjes së “peshqve të mëdhenj” që do të ndiqet se shpejti edhe nga raste të tjera.
Rama-koha për hapjen e negociatave të anëtarësimit
Asi që ka në dorë Shqipëria 3 javë para publikimit të Progress Raportit 2017 është pikërisht progresi në reformën në Drejtësi. Rezultatet konkrete në procesin e spastrimit të drejtësisë nga gjykatës dhe prokurorë të korruptuar kanë rritur shpresat e Shqipërisë për hapjen e negociatave të anëtarësimit me BE. Kjo pasi kryerja e vettingut dhe rezultatet e tij të prekshme janë kushti kryesor i KE. Shqipëria e meriton! Me këtë bindje kryeministri Rama ka nxitur ditët e fundit, Përfaqësuesen e Lartë të BE, Mogherini, Komisionerin Hahn dhe Parlamentin Europian që të kuptojnë se koha për hapjen e negociatave ka ardhur. ” Shqipëria nuk kërkon ndonjë dhuratë, as ndonjë favor që nuk e meriton. Shqipëria po kërkon thjesht të hapen negociatat , sepse e meriton” ka theksuar të premten,(23.03.2018) Rama, në një fjalë të mbajtur në Parlamentin Europian.
Krahas kësaj bindjeje kryeministrin Rama ka risjellë si argument situatën gjeo-politike në rajon, përpjekjet e Rusisë dhe aktorëve të tjerë si Kina apo Turqia për të rritur ndikimin e tyre. Hapja e negociatave si një progres drejt hyrjes në BE do ” të ndalojë shfaqjen e fantazmave të së kaluarës” ka theksuar kryeministri në Parlamentin Europian duke u risjellë në vëmendje euro-parlamentarëve se rajoni i njohur për konfliktet etnike dhe lufterat e pergjakshme pas viteve 1990 po forcon paqen dhe bashkëpunimin, pikërisht sepse ylli i tij polar është hyrja në BE. Por ngadalësimi i ritmeve në procesin e integrimit mund të sjellë pasoja negative ne pro-europianizmin e qytetarëve të Ballkanit Perëndimor, kur faktorë të tjerë gjeo-strategjike kërkojnë të rrisin aksionet e tyre në rajon, paralajmëroi në Bruksel përsëri kryemnistri Rama.
DW
Përgatiti: Alpenews.al
