Rusia nuk duhet të përdorë pretekste të rreme për të përshkallëzuar më tej konfliktin në Ukrainë. Kështu deklaroi sekretari i Përgjithshëm i NATO-s, Jens Stoltenberg nga bordi i aeroplanmbajtëses USS George HW Bush në të cilën ai ishte i ftuar.
“Sipas pretendimve të rreme ruse, Ukraina po përgatitet të përdorë një ‘bombë të pistë’ radiologjike në territorin e saj. Aleatët e NATO-s i kundërshtojnë këto pretendime të rreme. Rusia shpesh akuzon të tjerët për atë që ajo vetë synon të bëjë. Ne e kemi parë këtë model edhe më herët. Nga Siria në Ukrainë”.
Rusia përsëriti akuzat e saj se Ukraina po planifikon të shpërthejë një ‘bombë të pistë’ edhe në Këshillin e Sigurimit të Kombeve të Bashkuara. Lidhur me këtë çështje Stoltenberg theksoi dhe një herë tjetër se kërcënimet për përdorimin e armëve bërthamore nga presidenti rus Vladimir Putin janë të rrezikshme.
Ndërkohë situata në vijat e frontit të luftës vijon të jetë shqetësuese. Forcat ruse po përgatiten për beteja më të rënda në rajonin strategjik të Khersonit, padyshim më i rëndësishmi krahasuar me rajonet e tjera të aneksuara në Shtator, shkruan “Reuters”. Forcat ruse në rajon janë tërhequr mbrapa javët e fundit dhe rrezikojnë të bllokohen në bregun perëndimor të lumit Dnipro.
