Rreth 40 kompani nga Gjirokastra, Tepelena dhe Përmeti prezantojnë 416 vende të lira pune, në sektorët hoteleri-turizëm, industri përpunuese, ndërtim, punime artizanale, shërbime transporti, tregtare, apo telekomunikacioni, në Panairin Rajonal të Punës, që është hapur sot në Gjirokastër te ish- Shtëpia e Ushtarakëve ” (sot ADISA) në lagjien “18 Shtatori”.
Shërbimi Kombëtar i Punës bën të ditur se, në ditën e parë të këtij panairi ka një interes të shtuar të vizitorëve, ndërsa stafet e kompanive po vazhdojnë të intervistojnë kandidatë duke synuar rekrutimin e një fuqie punëtore të kualifikuar.
Përveç bizneseve, pjesëmarrës në panair janë dhe ofrues të arsimit dhe formimit profesional që ushtrojnë aktivitetin në Rajonin e Gjirokastër, përfaqësues të institucioneve vendore, si dhe përfaqësues të projekteve bashkëpunuese në fushën e Arsimit, Formimit Profesional dhe Punësimit.
