Publikohen pamjet nga momenti kur nëndetësja kamikaze e Hamasit hidhet në erë nga një dron në sulmet ajrore të kryera nga ushtria izraelite dhe ekuipazhi që ishte brenda një makine “neutralizohet”, në kohën kur bombardimet janë duke vazhduar në Gaza pavarësisht thirrjeve të Shteteve të Bashkuara për armëpushim.
Videoja është publikuar nga Izraeli, që shfaq dy shpërthimet nga droni pa pilot që hedh në erë nëndetësen që ishte shumë pranë disa shtëpive në veri të Gazës.
Pamjet e tjera nga ajri shfaqin një makinë që goditet nga raketa, duke e bërë rrafsh me tokën nga shpërthimi i fuqishëm.
Forcat izraelite kanë bërë të ditur se brenda automjetit dhe nëndetëses ishin militantë të Hamasit, që ishin bërë gati për sulme mbi qytetet izraelite. Kujtojmë që 212 palestinezë janë vrarë në Gaza nga java e kaluar, përfshirë 61 fëmijë.
Ushtria izraelite ka njoftuar se 120 anëtarë të Hamasit, dhe 25 tjerë të “xhihadit islamik” janë vrarë në sulmet ajrore.
