Pas një punë intensive për gati 2 vjet, ka përfunduar rikonstruksioni i Xhamisë së Et’hem Beut në Tiranë. Një xhami historike dhe një monument kulture, ndër më të rëndësishmit për kryeqytetin por edhe për të gjithë Shqipërinë
Xhamia e Et’hem Beut, është një nga 8 xhamitë më të vjetra, që i kanë mbijetuar të gjitha ndryshimeve politike, historike kulturore dhe ajo është një ndërtesë që i përket fundit të shekullit të 18.
Në një lidhje direkte për “Wake Up”, myftiu i Tiranës, Lauren Luli theksi se xhamia ka ruajtur origjinalitetin e saj dhe nuk janë shtuar ambiente.
“Besimtarët kanë pritur që prej dy vitesh që kjo xhami të hapej. Kjo xhami është simbol jo vetëm i besimtarëve, por i gjithë kryeqytetit. Është e vetmja xhami që i ka rezistuar të gjitha periudhave dhe asaj të komunizmit.
Besimtarët do të shohin ndryshimin që ka këtu, sepse kanë dalë në pah elementë që kanë qenë të fshehur para restaurimit. Këtu kemi ndërthurje mes abstraktes dhe reales. Nuk janë shtuar ambiente, është vënë në pah origjinaliteti dhe bukuria e kësaj xhamie.
Ky është një monument kulture i kategorisë së parë dhe nuk mund të ndërhyjmë më tej. Kjo është një xhami me ambiente modeste, 80-100 vetë mund të falen në kushte normale, ambienti jashtë 150 vetë dhe pjesa e grave ku mund të falen 20-25 vetë”, bëri të ditur myftiu.