Pesë persona tani janë konfirmuar të vdekur pasi një tjetër trup i pajetë është nxjerrë nga rrënojat e një kompleksi apartamentesh të shembur në Miami, Florida.
Duke folur në një konferencë për shtyp, kryebashkiakja e qarkut Miami-Dade, Daniella Levine Cava tha se ekipet e kërkimit dhe shpëtimit kishin zbuluar mbetje të tjera njerëzore të paspecifikuara.
Zyrtarët thanë se eshtrat po dërgohen në ekzaminuesin mjekësor dhe ata gjithashtu po mbledhin mostra të ADN-së nga anëtarët e familjes për të ndihmuar në identifikimin e tyre.
Katër nga personat që humbën jetën dhe janë nxjerrë nga rrënojat janë identifikuar si Stacie Fang, 54 vjeç, Antonio Lozano, 83 vjeç, Gladys Lozano, 79 vjeç dhe Manuel LaFont, 54 vjeç.
Një pjesë e madhe e ndërtesës 12-katëshe Champlain Towers South në Surfside u shndërrua në rrënoja kur u përplas në tokë rreth orës 1.30 të mëngjesit të enjten me orën lokale.
Numri i atyre qe nuk gjenden ka zbritur në 156, ndërsa i atyre që janë gjetur në 130.
Zonja Levine Cava tha se operacioni i vazhdueshëm i shpëtimit po vështirësohej rëndë nga një zjarr brenda rrënojave, por shtoi: “Prioriteti ynë kryesor vazhdon të jetë kërkimi dhe shpëtimi dhe shpëtimi i çdo jete që mundemi.”
Zyrtarët thanë se ata ende shpresonin që disa nga ata që rezultojnë të zhdukur mund të gjendeshin të gjallë.
Të ndihmuar nga qentë, skanimi me rreze infra të kuqe dhe pajisjet e rënda, ekipet e shpëtimit shpresojnë që xhepat e ajrit që mund të jenë formuar në mbeturinat mund t’i mbajnë njerëzit gjallë.
“Gjëja më e madhe tani është shpresa”, tha shefi i zjarrit në Miami-Dade Alan Cominsky. “Kjo është ajo që na shtyn. Është një situatë jashtëzakonisht e vështirë.”
Më herët të shtunën, zonja Levine Cava tha se një zjarr “shumë i thellë” në mbeturinat kishte sjellë “vështirësi të jashtëzakonshme” për ekipet e shpëtimit për shkak të flakëve.
Në një moment, një zjarr shpërtheu një nga katet më të ulëta në anën veriore të kullës ndërsa tymi i bardhë ose avulli dilnin dhe një erë e hidhur, e ngjashme me squfurin ndihej në ajër.
Mes atyre që mezi presin lajmet për të dashurit e tyre të zhdukur është edhe Rachel Spiegel, nëna e së cilës, 66-vjeçarja Judy Spiegel, jetonte në katin e gjashtë.
Duke folur së bashku me vëllezërit e motrat e saj, ajo tha “ne po përpiqemi të qëndrojmë së bashku”.
“E di që nëna ime është një luftëtare. E di që ajo na do. Unë e di që ajo nuk dëshiron të heqë dorë. Pra, ju e dini, është dita e tretë, kështu që është e vështirë,” shtoi zonja Spiegel.
Presidenti Joe Biden tha se ai kishte folur me Guvernatorin e Floridës Ron DeSantis për të ofruar ndihmë sipas nevojës.
“Zemra ime është me komunitetin e Surfside ndërsa ata qajnë për të dashurit e tyre të humbur dhe presin me ankth ndërsa përpjekjet e kërkimit dhe shpëtimit vazhdojnë”, shkroi Biden në “Twitter”.
Ndërkohë, një raport i sapo lëshuar i vitit 2018 tregoi se një inxhinier gjeti prova të dëmtimit të madh strukturor nën kuvertën e pishinës dhe “përkeqësimit të betonit” në garazhin nëntokësor të parkimit të Champlain Toëers South, tre vjet para se të rrëzohej pa paralajmërim të enjten.
Autoritetet thanë se ata do të fillojnë një auditim brenda 30 ditëve të ardhshme të ndërtesave afër që i afrohen shqyrtimit të tyre 40-vjeçar për të siguruar sigurinë e tyre.
