Të moshuarit kanë dalë për të disatën herë në protestë ditën e sotme, duke kërkuar rritje të pensioneve të tyre.
Me thirrjet “Pagat për veten ju i dyfishuat, ndërsa pensionistët ju i varfëruat….Do ta ngremë zërin, do dalim në rrugë…”, ata janë mbledhur para godinës së Kryeministrisë, ku i kërkojnë kreut të qeverisë Edi Rama, të hedhë sytë drejt tyre.
Kjo është hera e katërt që ata protestojnë para ndërtesës së kryeministrisë duke i parashtruar kërkesat e tyre ekzekutivit shqiptar.
“Unë me pensionin që marr, kaloj vetëm 4 ditë. Shyqyr që kam një fëmijë jashtë. Ai ia heq fëmijës së vet nga goja e na mban ne. Kam punuar 40 vjet në uzinë me turne, të lodhur e të nëpërkëmbur. Këta rrojnë në planetin Mars, janë shkëputur totalisht nga ne. Po na ikin fëmijët që mezi i kemi rritur me gjak trupi.
Shyqyr që kemi fëmijët na ndihmojnë ata se po të ishin këtu, do ishin pa punë ata e keq e më keq neve. Kryetarët e bashkive po i rrisin rrogat e tyre, po i çojnë gati 3 milionë lekë, po për ne pensionistët kush do mendojë. Me thuaj një punë që bën një deputet që të paguhet aq shumë para në muaj.”- tha një prej tyre.
