Tre shqiptarë përfunduan në faqet e gazetave gjermane, për shkak se humbën nëpër rrugët e Gjermanisë. Sipas gazetës BS, tre shqiptarët kishin mbaruar punën të premten në darkë në Mynih dhe u nisën me shpejtësi në drejtim të Salzburgut, me qëllim që të kalonin fundjavën me familjen e tyre në Shqipëri. Vetëm një prej tyre e dinte rrugën, por atë e zuri gjumi. Shoferi, në vend që të shkonte drejt Salzburgut, përfundoi në Shtutgart. Kur pasagjeri që dinte rrugën, u zgjua, e kuptoi se kishin udhëtuar në drejtimin e gabuar për dy orë. Ai i kërkoi shoferit që të ktheheshin në Mynih dhe të niseshin sërish drejt Salzburgut.
Atë e zuri gjumi sërish dhe shoferi 40-vjeçar këtë herë u largua sërish nga rruga e duhur dhe përfundoi në Kempten. Këtu makinën e ndaloi një patrullë policie.
Shoferi 40-vjeçar nuk kishte një patentë të rregullt shoferi dhe u detyrua që të paguante një depozitë garancie prej 300 eurosh. Fundjava i shkoi dëm. Tashmë ai akuzohet për drejtim të automjetit pa leje.
