Operacioni Forcat e Ligjit ka zbarkuar mëngjesin e sotëm në Tiranë dhe u ka dërguar formularin për vetëdeklarimin e pasurisë tre subjekteve. Formulari u është dërguar Denis Qordjës, Fatjon Manabej e Shkëlqim Sharrës, të cilët për 48 orë duhet të dorëzojnë formularin me pasuritë të cilat zotërojnë.
Të tre emrat janë të njohur për drejtësinë, ku Fatjon Manabej është në kërkim në Itali si pjesë e një grupi kriminal. Denis Qordja (Dervishi) është dënuar më herët për shfrytëzim prostitucioni, ndërsa Shkëlqim Sharra është dënuar për trafik ndërkombëtar droge.
Këta individë, si subjekt i Ligjit Special, duhet t’u përgjigjen me shkrim brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme. OFL deklaron se është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
