Për shkak të mënyrës sesi Ilir Meta po e luan rolin e tij kushtetues, pa e kuptuar as edhe ai vetë, po e shndërron çdo ditë e më shumë 25 prillin në një referendum kundër Presidentit të Republikës. E thonë këtë edhe sondazhet e fundit në televizionet më pranë tij, sipas të cilave del se Kryetari i Shtetit, është aktualisht udhëheqësi më pak i pëlqyer në vend.
Në pikën e sondazhit rreth pëlqyeshmërisë publike të liderëve politikë, i vetmi ndër të gjithë kryesorët në qarkullim që nuk kuotohej fare, ishte Ilir Meta. Kjo është edhe një nga arsyet thelbësore se përse LSI, e cila identifikohet me figurën e tij, i ka kuotat gjithmonë e më të ulëta sa më shpejt që po i afrohemi të dielës së madhe të votimeve.
Kjo situatë nuk ka sesi të mos favorizojë gjithmonë e më shumë PS së cilës i janë bashkuar shumë ndër ata që ia dhanë votën LSI në 2017. Kjo e ka tërbuar akoma më shumë Ilir Metën, duke dalë hapur në një konferencë të posaçme në Presidencë, në mbështetje të fushatës elektorale të partisë së tij familjare.
Nga aty ai ka deklaruar se, nëse Edi Rama do fitojë në këto zgjedhje 71 mandate, ai do japi dorëheqjen si President i Republikës. Aq pak jeton në realitet Ilir Meta, duke fluturuar larg e më larg në atë botën e tij paralele, sa beson se duke thënë këtë do ti bëjë shqiptarët ti japin më shumë vota LSI dhe opozitës.
Por, e kundërta është e vërtetë, sipas të gjitha sondazheve të zhvilluara deri më sot në mediat shqiptare. Ato tregojnë se, sa më shumë që Ilir Meta bën liderin e partisë dhe jo Kryetarin e Shtetit, aq më shumë PS dhe Edi Rama e konsolidojnë pozicionin e tyre duke gëzuar më shumë mbështetje se të gjitha partitë dhe koalicionet opozitare të mara sëbashku.
Në këto kushte, është e qartë se 25 prilli, po shndërrohet në një referendum kundër Ilir Metës. Ndaj kushdo që ka patur deri tani merakun, se ai nuk duhet të ishte apo të jetë akoma President, ka një shans të artë për ta përmbushur. Të dielën, mjafton që ti japin Edi Ramës 71 deputetë, për të larguar Ilir Metën nga zyra e Kryetarit të Shtetit.
Superoferta e kësaj të diele elektorale, mer në këtë mënyrë, një trajtë mjaft të thjeshtë dhe të qartë: Jepini Edi Ramës mandatin e tretë si Kryeministër, që ta shkarkoni menjëherë, Ilir Metën si President i Republikës!
Alpenews.al
