Pas evakuimit të pasagjerëve të fundit nga anija MV Hondius, e cila u prek nga një shpërthim i hantavirusit, Drejtori i Organizatës Botërore të Shëndetësisë, Tedros Adhanom Ghebreyesus, tha se nuk ka shenja për një shpërthim më të gjerë.
Megjithatë, ai paralajmëroi se situata mund të ndryshojë dhe ka mundësi për raste të tjera të konfirmuara në javët e ardhshme.
Anija MV Hondius u nis nga Tenerife të hënën dhe po udhëton drejt portit holandez të Rotterdamit, ndërsa dy fluturime me pasagjerët e fundit mbërritën të martën në Eindhoven, shkruan BBC.
Tre persona kanë humbur jetën pas udhëtimit në anije. Një grua franceze dhe një spanjoll, të cilët u kthyen më parë në vendet e tyre, testuan pozitiv. Në total, OBSH ka konfirmuar 9 raste, me dy të tjerë të dyshuar. Gruaja franceze është në kujdes intensiv në Paris dhe trajtohet me mushkëri artificiale, ndërsa pacienti spanjoll ka simptoma të lehta të frymëmarrjes.
Dymbëdhjetë punonjës të një spitali në Holandë ndodhen në karantinë pas trajtimit të një pasagjeri të evakuuar, pasi nuk ndoqën protokollet strikte të sigurisë gjatë manipulimit të mostrave të gjakut dhe urinës.
Tedros Adhanom Ghebreyesus tha në një konferencë shtypi në Madrid: “Aktualisht nuk ka shenja se po shohim fillimin e një shpërthimi më të madh. Por situata mund të ndryshojë, duke marrë parasysh periudhën e gjatë të inkubacionit të virusit.”
Hantaviruset zakonisht transmetohen nga minjtë, por varianti i Andeve, që besohet se u infektuan disa pasagjerë në Amerikën e Jugut, mund të transmetohet edhe nga njeriu. Simptomat përfshijnë ethet, lodhje ekstreme, dhimbje muskujsh, dhimbje barku, të vjella, diarre dhe vështirësi në frymëmarrje.
Në Spanjë, një nga 14 qytetarët e karantinuar në Madrid pas evakuimit testoi pozitiv me hantavirus, me simptoma të lehta dhe gjendje të qëndrueshme. Në Itali, po mblidhen mostra biologjike nga një burrë që udhëtoi me një grua që më vonë vdiq nga virusi. Mostrat do të analizohen në spitalin kryesor të sëmundjeve infektive në Romë, Spallanzani.
Franca raporton se situata është nën kontroll, me një grua në kujdes intensiv, ndërsa 22 persona të tjerë të kontaktit mbahen në izolim. Dy britanikë me raste të konfirmuara trajtohen aktualisht në Holandë dhe Afrikën e Jugut.
Anija MV Hondius pritet të mbërrijë në Rotterdam më 17 maj, ku do të pastrohet dhe dezinfektohet. 122 pasagjerë dhe ekuipazhi janë evakuuar deri tani drejt Holandës dhe vendeve të tyre përmes fluturimeve të organizuara nga qeveritë.
Nga 27 personat që mbetën në bord, 25 janë pjesëtarë të ekuipazhit dhe dy staf mjekësor, nga vende të ndryshme si Filipinet, Holanda, Ukraina, Rusia dhe Polonia. Ukrainasit do të ndihmojnë në transferimin e anijes dhe do të karantinohen në Holandë, pa shenja sëmundjeje.
Viktimat e para përfshijnë një burrë 70-vjeçar holandez që vdiq më 11 prill, gruan e tij 69-vjeçare në Afrikën e Jugut dhe një grua gjermane më 2 maj.
MV Hondius kishte nisur udhëtimin më 1 prill nga Ushuaia, Argentina, me 147 pasagjerë dhe ekuipazh nga 23 vende.
